फोंडा: मराठीला राजभाषेचे स्थान मिळवून देण्यासाठी मराठीप्रेमी एकवटले असून गोमंतकीय संस्कृतीचा आदर्श ज्या मराठी भाषेने घालून दिला त्या मराठी भाषेला आता मानाचे स्थान मिळणारच असा विश्‍वास मराठीप्रेमींनी व्यक्त केला. फर्मागुढी - फोंडा येथे गुढी पाडव्यादिनी मराठी राजभाषा समितीतर्फे मराठी राजभाषेची गुढी उभारून मराठीचा जयघोष केला.

यावेळी मराठीप्रेमी शाणूदास सावंत, राजाराम जोग, मच्छिंद्र च्यारी, राजाराम पाटील, शिवराम पोकळे, नवनाथ मुळवी, प्रेमानंद सावंत, प्रणिता च्यारी, ऋषी च्यारी व समर्थ च्यारी तसेच इतर मराठीप्रेमी उपस्थित होते.

यावेळी राजाराम जोग, शाणूदास सावंत तसेच राजाराम पाटील, मच्छिंद्र च्यारी व इतरांनी मराठी भाषेसंबंधी आपल्या भावना व्यक्त करताना आतापर्यंत मराठीसाठी मराठीप्रेमींनी मोठा लढा उभारला. विधानसभेत मराठी राजभाषेसाठी ठराव मांडला गेला, पण काहीजणांनी दगा दिला. आता मराठीसाठी निर्णायक भूमिका घेण्याची वेळ आली असून सर्व मराठीप्रेमींनी एकसंध होऊन मराठीला मानाचे स्थान मिळवून देण्यासाठी निर्धार केला आहे. या निर्धाराला निर्णायक स्वरूप निश्‍चितच मिळेल, असा विश्‍वासही मराठीप्रेमींनी व्यक्त करून मराठी भाषेची गुढी फर्मागुढीत उभारली.

यावेळी मराठी भाषेचा जयघोष करून मराठीला राजभाषेचे स्थान मिळायलाच हवा असा पुनरुच्चार केला.