वास्को: प्लास्टिक ध्वजाचा उपयोग करू नये. राष्ट्रध्वजाचा अवमान होणार नाही यासंबंधी दक्षता घ्यावी, असे आवाहन रवींद्र भवनाचे अध्यक्ष जयंत जाधव यांनी केले. देशाच्या स्वातंत्र्याच्या अमृतमहोत्सवी वर्षानिमित्त 'हर घर तिरंगा' संबंधी जागृती करण्यासाठी रवींद्र भवन बायणा येथे एका कार्यक्रमाचे आयोजन करण्यात आले होते.

(Ensure National Flag is not Disrespected Event was held at Ravindra Bhavan, Baina)

13 ते 15 ऑगस्ट पर्यंत घरांवर फडकविण्यात येणाऱ्या राष्ट्रध्वजासंबंधी कोणती खबरदारी घेण्यात यावी, यासंबंधी माहिती देण्यात आली. भारतीय तटरक्षक दल गोवा मुख्यालयाने रवींद्र भवन बायणा, मुरगाव उपजिल्हाधिकारी व मामलेदार कार्यालय यांच्या सहकार्याने 'हर घर तिरंगा' जागृती कार्यक्रमाचे आयोजन केले होते.

या कार्यक्रमास तटरक्षक दलाचे वरिष्ठ अधिकारी, रवींद्र भवनाचे अध्यक्ष जयंत जाधव, मामलेदार रणजित साळगावकर व इतर अधिकारी उपस्थित होते. कार्यक्रमाला उपस्थित असलेले सरकारी कर्मचारी, रवींद्र भवनाचे कर्मचारी व नागरिक यांना 'हर घर तिरंगा' संबंधी मार्गदर्शन करण्यात आले.

घरोघरी राष्ट्रध्वज फडकविताना मोठी खबरदारी घ्यावी, असे आवाहन करण्यात आले. राष्ट्रप्रेम वाढीस लागावे, देशाबद्दल अभिमान द्विगुणित व्हावा यासाठी सदर कार्यक्रमाचे आयोजन करण्यात आले आहे, अशी माहिती जाधव यांनी दिली. सदर कार्यक्रम यशस्वी करण्यासाठी प्रत्येकाने पुढाकार घ्यावा, असे आवाहन त्यांनी केले.