Goa Agriculture: कृषी क्षेत्रातील प्रगत संशोधन शेतकऱ्यापर्यंत पोहोचावे. त्याआधारे कृषी उत्पन्न, उत्पादन आणि इतर पूरक व्यवसाय वाढीस लागावेत यासाठी आयसीएआर- केंद्रीय किनारी संशोधन संस्था ओल्ड गोवा येथे 8 ते 10 फेब्रुवारी दरम्यान कृषी कार्यक्रम निर्मात्यांसाठी प्रभावी मूल्यांकन आणि क्षमता विकास कार्यशाळेचे आयोजन करण्यात आले आहे.

आकाशवाणी आणि दूरदर्शनचे उपमहासंचालक सुनील भाटिया यांनी आज पत्रकार परिषदेत कार्यशाळेची माहिती दिली. ते म्हणाले, कृषी मंत्री रवी नाईक, आकाशवाणीच्या महासंचालक डॉ वसुधा गुप्ता यांच्या उपस्थितीत बुधवारी कार्यक्रमाचे उद्‍घाटन होईल.

कार्यशाळेत दक्षिण-पश्‍चिम विभागातील 35 विविध स्थानकांतील कार्यक्रम अधिकारी/निर्माते सहभागी होणार आहेत. 

कार्यशाळेदरम्यान कृषी विषयांवर व्याख्याने, किसान वाणी कार्यक्रमातील आव्हाने आणि किसान वाणी कार्यक्रमाची सद्यस्थिती यांचा समावेश आहे.

यावेळी आंतरराष्ट्रीय भरड धान्य- 2023, समाज माध्यमांची व्याप्ती वाढवणे आणि भारताची कृषी तंत्रज्ञान स्टार्टअप इकोसिस्टम: संभाव्य आणि आव्हाने यावर उहापोह केला जाणार आहे.

शेतकऱ्यांचा गौरव

कार्यशाळेदरम्यान सहभागींना निरंकाल, फोंडा येथील पुरस्कार प्राप्त शेतकऱ्यांच्या यशोगाथा प्रत्यक्ष दाखवण्यात येणार आहेत. तसेच गोव्यातील प्रगतशील आणि पुरस्कार विजेत्या शेतकऱ्यांचा सत्कार करण्यात येणार आहे. संपूर्ण कार्यशाळेचे संचलन विजेंद्र सजवान, कार्यक्रम निर्माता, कृषी आणि गृह विभाग, आकाशवाणी, नवी दिल्ली यांच्याद्वारे करण्यात येणार आहे.