Goa Road: स्मार्ट सिटी मिशनअंतर्गत पणजीतील सांतिनेज भागात सध्या रस्ता निर्मितीचे काम जोरदार सुरू आहे. काँक्रिटीकरणाच्या रस्त्याच्या बाजूला पदपथ निर्मितीसाठी अडथळा ठरणारी अतिक्रमणे हटविण्यात आली.

तर मधुबन सोसायटी ते वेलनेस मेडिकल रस्त्याला अडथळा ठरणारी सोसायटीची संरक्षक भिंत आणि एक वटवृक्ष, एक माड हटविण्यात आले. तर इतर अडथळे ठरणारी अतिक्रमणे हटविण्यासाठी प्रशासकीय सोपस्कार महानगरपालिकेच्यावतीने सुरू असल्याची माहिती हाती आली आहे.

पणजीत स्मार्ट सिटीची कामे 31 मेपर्यंत पूर्ण करण्यात येणार असल्याचे राज्य सरकारच्यावतीने मुख्यमंत्री डॉ. प्रमोद सावंत यांनी जाहीर केले आहे. त्यामुळे ही वेळ पाळण्यासाठी इमॅजिन पणजी स्मार्ट सिटी विकास लिमिटेड (आयपीएससीडीएल) ही कंपनी आपल्यापरीने शर्थीचे प्रयत्न करीत आहे.

आयपीएससीडीएलने सांतिनेजमधील रस्ता निर्मितीची कामे करताना जी बांधकामे अडथळा ठरत आहेत, ती हटविण्याची विनंती महानगरपालिकेला केलेली आहे.

पणजीचे आमदार तथा महसूल मंत्री बाबूश मोन्सेरात यांनी स्मार्ट सिटीच्या सुरू असलेल्या कामांची पाहणी करण्यास सुरुवातही केली होती. त्याचवेळी जी अतिक्रमणे अडथळे ठरत आहेत, ती सर्व हटविली जातील, असे त्यांनी सांगितले होते.

गतीने हालचाली आवश्‍यक

काहींची अतिक्रमणे रस्त्याला अडथळा ठरतात हे माहीत असतानाही ती अतिक्रमणे ते स्वतःहून काढत नाहीत, असे दिसत आहे. महानगरपालिका जेवढ्या लवकर ही कायदेशीर प्रक्रिया करून घेत नाही,

तोपर्यंत स्मार्ट सिटीची कामे पुढे सरकरणार नाहीत, हेही आयपीएससीडीएलच्या अधिकाऱ्यांना माहीत आहे. त्यामुळे सरकारी पातळीवर या कामांशी जोडलेल्या सर्व यंत्रणांना गतीने हालचाली केल्याशिवाय पर्याय नाही, हे स्पष्ट आहे.