आठवड्यापूर्वी दोन दिवसात बँकेतून कर्ज काढून खात्यात वेतन जमा केले जाईल, असे आश्वासन देऊनही मुरगाव पालिका मुख्याधिकारी जयंत तारी आश्वासनपूर्ती करू न शकल्याने मुरगाव पालिका कर्मचाऱ्यांच्या आशेवर पाणी फेरले आहे. दोन दिवसात वेतन खात्यात जमा न झाल्यास काम बंद ठेवण्याचा इशारा यावेळी कर्मचाऱ्यांनी दिला आहे. कामगार संघटनेचे अध्यक्ष केशव प्रभू हे वेतन प्रश्‍नी लक्ष घालत नसल्याने ही स्थिती उद्भवली असल्याचा आरोप पालिका कर्मचाऱ्यांनी वारंवार करत आहेत.

दरम्यान, मुरगाव (Mormugao) पालिकेच्या कर्मचाऱ्यांचे दोन महिन्यांचे प्रलंबित वेतन सोमवारपर्यंत न मिळाल्यास बेमुदत संपावर जाण्याचा निर्णय कर्मचारी (Employees) वर्गाने घेतला आहे. त्यामुळे पालिका (Municipality) अधिकारी या संबंधी काय निर्णय घेणार याकडे सर्वांचे लक्ष लागले आहे. तसेच कर्मचारी वर्ग देखील काय भूमिका घेणार याकडे नागरिकांचे लक्ष लागले आहे. कारण कर्मचारी वर्ग संपावर गेल्यास नागरिकांची गैरसोय होणार आहे.