मडगाव येथे एका 9 वर्षीय अल्पवयीन मुलाला विज प्रवाहाचा झटका लागून मृत्यू झाल्याची घटना घडली आहे. महाकल निषाद असे मयत मुलाचे नाव असून आपल्या राहत्या घरात सकाळच्या वेळी पाणी गरम करण्याच्या हिटरच्या संपर्कात आला होता.

मडगावातील गांधी मार्केट परिसरात ही धक्कादायक घटना घडली आहे. पालकांनी इलेक्ट्रिक वॉटर हिटर वापरताना योग्य ती काळजी न घेतल्याने एका लहान मुलाला मात्र आपला जीव गमावावा लागला आहे. सकाळी नेहमीप्रमाणेच घरामध्ये पाणी तापवण्यासाठी हिटर लावण्यात आला होता. मात्र यावेळी चुकून हात लागल्यामुळे त्याला वीज प्रवाहाचा झटका लागला आणि त्याचा मृत्यू झाला असल्याची माहिती पोलीस सूत्रांकडून देण्यात आली आहे.

दरम्यान गोव्यात गेल्या काही दिवसांमध्ये थंडीत मोठी वाढ झाली आहे. त्यामुळे पाणी तापवण्यासाठी वापरला जाणारा हिटर बराच वेळ वापरात असतो. गोव्यात मोठ्या प्रमाणावर परप्रांतीय कामगार राहतात ज्यांच्याकडून सर्रासपणे पाणी तापवण्यासाठी अशा हिटरचा वापर होतो. मात्र योग्य ती काळजी न घेतल्यामुळे आज एका मुलाला नाहक आपला जीव गमावावा लागला आहे.