नुकत्याच झालेल्या फोंडा व साखळी पालिकांच्या निवडणुकीनंतर आता तेथे नगराध्यक्ष कोण यासंदर्भात वेगवेगळे आडाखे, तर्क-वितर्क व्यक्त करण्यात येत आहेत. 16 रोजी या दोन्ही ठिकाणचे नगराध्यक्ष ठरणार असल्याची माहिती नगरपालिका प्राधिकरण संचालक गुरुदास पिळर्णकर यांनी दिली. 15 तारखेला दुपारी 1 वाजेपर्यंत नगराध्यक्ष व उपनगराध्यक्ष पदांचे अर्ज उमेदवारांना भरता येतील.

दोन्ही पालिकांचे 5 मे रोजी मतदान झाले, तर 7 रोजी निकाल जाहीर झाला. फोंड्यात भाजपने मंत्री रवी नाईक यांच्या नेतृत्वाखाली घवघवीत यश मिळविले. रवी यांचे दोन्ही पुत्र रितेश आणि रॉय हे निवडून आले. भाजपने फोंड्यात 10 जागा मिळवत सत्ता ताब्यात ठेवली.

साखळीत रोटेशन

साखळीत निकिता नाईक, सिद्धी परब, रश्‍मी देसाई, विनंती पार्सेकर, दीपा जल्मी आणि अंजना कामत या सहा नगरसेविका निवडून आल्या आहेत. महिलांचा सन्मान करण्यासाठी चौघींना प्रत्येकी एक वर्षे, तर उर्वरित दोघींना प्रत्येकी सहा-सहा महिने नगराध्यक्ष पद देण्याचा विचार भाजपच्या गोटात सुरू आहे. तसेच पाच नगरसेवकांना प्रत्येकी एक वर्ष उपनराध्यक्ष पद देण्यात येणार असल्याची माहिती मिळाली.