गोव्यातील बेकायदा खाण व्यवसायप्रकरणी क्राईम ब्रँचने केलेल्या तपासकामाच्या आधारे दिल्लीच्या सक्तवसुली संचालनालयाने (ईडी) मे. मॅग्नम मिनरल्स तसेच काडणेकर आणि कुटुंब यांची सुमारे 13.38 कोटींची स्थावर व जंगम मालमत्ता मनी लाँडरिंग प्रतिबंधक कायद्याखाली जप्त केली आहे.

राज्यातील क्राईम ब्रँचने भ्रष्टाचार प्रतिबंधक कायद्याखाली काही खाणपट्टेधारक तसेच खाण ऑपरेटर्सनी केलेल्या बेकायदा खनिज उत्खननप्रकरणी गुन्हे दाखल केले आहेत. या गुन्ह्यांचा तपास करताना खाणमालकांनीच खाण खात्याशी संगनमत करून फसवणूक केल्याचे ‘ईडी’ला आढळून आले आहे.

खाण खात्याशीही संगनमत

ही फसवणूक खाण खात्याचे अधिकारी व खाणपट्टे धारकांच्या संगनमताने झाल्याने ‘ईडी’ने या प्रकरणाची चौकशी सुरू केली आहे. मे. मॅग्नम व काडणेकर आणि कुटुंबाच्या स्थावर व जंगम मालमत्तेबाबत तपास सुरू केला होता.

त्यांनी जमा केलेल्या या मालमत्तेचा मनी लाँडरिंग प्रकरणाशी संबंध असल्याच्या संशयाने ती जप्त केली आहे. ‘ईडी’ने केलेल्या या कारवाईतून 1.04 कोटींची स्थावर, तर 12.34 कोटींची जंगम मालमत्ता जप्त केली आहे.