Panjim Road Condition: पणजी शहरातील सांतिनेज ते तांबडीमातीपर्यंतच्या रस्त्याच्या बाजूच्या गटाराचे काम सुरू आहे. खोदलेल्या गटाराची माती बाजूलाच टाकली असल्याने वाहनांच्या वर्दळीमुळे ती रस्त्यावर पसरली जात आहे. त्याशिवाय काही ठिकाणी दगडमातीने भरलेले खड्डे पुन्हा होत्या त्या स्थितीत आले आहेत.

त्यामुळे मोठ्या वाहनांमुळे या मार्गावर धूळ उडत असून त्याचा दुचाकीस्वारांना त्रास होत आहे. सांतिनेजमध्ये मागील काही महिन्यांत मलनिस्सारण वाहिन्या टाकण्यासाठी व चेंबर बांधण्यासाठी काम सुरू असताना दुचाकीस्वारांना त्रास सहन करावा लागला होता. आता सांतिनेजमधील विवांता हॉटेलच्या चौकापासून ते आरबीआय अधिकाऱ्यांच्या बंगल्यापर्यंत गटाराचे काम सुरू आहे. त्यानंतर पुढे ‘वाय’ चौकातून सरकारी वसाहतीपासून स्मशानभूमीपर्यंत गटाराचे काम सुरू आहे.

जेसीबीच्या साह्याने रस्त्याच्या एका बाजूला खोदकाम करण्यात आले असून माती रस्त्याच्या बाजूला टाकण्यात आली आहे. सांतिनेजमधील काही सोसायटीतील नागरिकांना नगरसेवकांकडे तक्रार केली आहे. नगरसेवकांनी तक्रारी ऐकून घेतल्या असल्या तरी गटाराचे काम पूर्ण होत नाही, तोपर्यंत नागरिकांना हा त्रास सहन करावा लागणार आहे.