डिचोली: मागील आठवड्यापासून कहर केलेल्या पावसाचा जोर पुन्हा वाढला असून,काल रात्रीपासून मुसळधार पर्जन्यवृष्टी सुरु आहे. आज शनिवारी काहीवेळ वगळता दिवसभर कोसळधार पाऊस पडला. पावसाच्या तडाख्यात काल मध्यरात्री ते  शनिवारी दुपारपर्यंत तीन ठिकाणी झाडांची पडझड झाली होती. आमोणे येथे एका घरावर झाड कोसळून घराची मोडतोड झाली. अशी माहिती डिचोली अग्निशमन दलाकडून मिळाली आहे.(Due to heavy rains a large rock fell on the side road from Sanquelim to vardi )

दरम्यान, कोसळधार पावसामुळे साखळी ते विर्डी या बगलमार्गावर दरडीसह भलामोठा दगड कोसळण्याची घटना घडली. दगड रस्त्यावर कोसळल्याने दुपारपर्यंत या बगलमार्गावरुन अवजड वाहतूक बंद होती. केवळ  दुचाकी आणि मोटारगाड्यांना वाहतूक करायला मिळत होती. कोसळधार पावसामुळे साखळीतील वाळवंटीसह डिचोली  नदीच्या पाण्याची पातळी पुन्हा वाढू लागली आहे.

गोव्यातील तृतीयपंथी आणि देहविक्री व्यवसायातील महिलांसाठी लसीकरण मोहिम राबवा

दुपारपर्यंत डिचोली नदीच्या पाण्याची पातळी 2.4 मीटरपेक्षा अधिक तर वाळवंटी नदीच्या पाण्याची पातळी दिड मीटर पेक्षा अधिक झाली होती. पावसामुळे जनजीवन पूर्णपणे विस्कळीत झाले आहे. बहूतेक भागातील वीज पुरवठ्यावरही परिणाम झाला. दिवसभर आकाशात ढगही दाटून होते. कोसळधार पावसामुळे आपत्कालीन यंत्रणा सतर्क झाली आहे. पावसाचा जोर वाढला असला, तरी परिस्थिती नियंत्रणात असल्याचे डिचोलीचे मामलेदार प्रवीणजय पंडित यांनी सांगितले.