गोव्यात आग लागण्याच्या घटनांमध्ये गेल्या काही दिवसांपासून कमालीची वाढ झाली आहे. सत्तरीमध्ये सुक्या गवताला आग लागून हजारो रुपयांचं नुकसान झालं आहे. आज शुक्रवारी सकाळीच ही आग लागल्याची प्राथमिक माहिती आहे. अग्निशमन दलाला याची माहिती मिळताच तातडीने घटनास्थळी दाखल होत पथकाने आगीवर नियंत्रण मिळण्यासाठी प्रयत्न सुरु केले आहेत.

सत्तरीमधील केरीमध्ये आजोबा मंदिराजवळ सुक्या गवताला आग लागली. दुपारची वेळ असल्याने ही आग वाढतच गेली. अखेर स्थानिकांनी याची माहिती अग्निशमन दलाला दिली. यानंतर अग्निशमन दलाच्या पथकाने घटनास्थळी दाखल होत आग विझवण्याचा प्रयत्न केला. दुसरीकडे सत्तरी तालुक्यातच कोपार्डे येथे काकोडकर फार्मजवळ काजूमध्ये आग लागली. या दोन्ही आगीच्या घटनांमध्ये हजारो रुपयांचं नुकसान झाल्याचा अंदाज वर्तवण्यात आला आहे.

नागवाडो बेतालभाटी येथे काल रात्री एका घराला आग लागून 10 लाखांचे नुकसान झाल्याची माहिती मिळाली आहे. मोहित गोडबोले यांच्या मालकीचे हे घर असून रात्री या घरातून अचानक धूर येत असल्याचे पाहिल्यावर शेजारच्या लोकांनी जवळ येऊन पाहिले तर घराने पेट घेतला होता.

या आगीत सुमारे 10 लाखांचे नुकसान झाल्याची माहिती घरमालकाने दिली. ही आग नेमकी कशी लागली त्याची माहिती मिळू शकली नाही. ही आग विझविण्यासाठी अग्निशमन दलाला पाचारण करण्यात आले मात्र आगीचा बंब पोहोचण्यापूर्वीच लोकांनी ती आटोक्यात आणली.