Donapaula Jetty: अनेक दिवसांपासून सुरू असलेल्या दोना पावला जेटीचे (Donapaula Jetty) काम पूर्ण झाले असून, येत्या एक डिसेंबरला जेटी सुरू होणार आहे. अशी माहिती पर्यटनमंत्री रोहन खंवटे (Tourism Minister Rohan Khaunte) यांनी दिली. तसेच, डिसेंबरमध्ये होणाऱ्या सनबर्न फेस्टिव्हलमध्ये (Goa Sunburn Festival) गोमंतकीयांना योग्य व्यासपीठ मिळेल असे आश्वासन देखील खंवटे यांनी यावेळी दिले.

पणजीतील पर्यटन सुविधा वाढवण्याबाबत पणजीचे आमदार व कामगार मंत्री बाबूश मोन्सेरात, पर्यटनमंत्री रोहन खंवटे आणि अधिकारी यांच्यात आज एक बैठक पार पडली. याबैठकीनंतर खंवटे प्रसारमाध्यमांशी बोलत होते. खवंटे म्हणाले, राज्यातील सर्व बेकायदा प्रकार थांबायला हवेत, त्यासाठी आम्ही काम करत आहोत. बेकायदेशीर कामांना प्रोत्साहन देणारे तसेच, बेकायदेशीर काम करणाऱ्यांविरोधात कारवाई करावीच लागेल. पर्यटनात कोणतेही अडथळे नकोत यासाठी आम्ही काम करत आहोत.

येत्या डिसेंबरमध्ये सनबर्नचे आयोजन केले आहे. या सनबर्नमध्ये गोमंतकीयांना योग्य व्यासपीठ मिळेल असेही खवंटे यांनी यावेळी सांगितले. शॅक शूल्क संबधितचा शॅक मालकांचा मुद्या मुख्यमंत्री प्रमोद सावंत यांच्यासमोर मांडला आहे. शूल्क कमी करण्याचा निर्णय आज किंवा उद्या घेतला जाईल असे खवंटे म्हणाले. तर, दोना पावला जेटीचे काम पूर्ण झाले असून, एक डिसेंबरला ती सुरू होणार असल्याचे खवंटे म्हणाले.