पणजी: शाळांना दिवाळीची सुट्टी असल्याने महाराष्ट्रासह इतर राज्यांतील पर्यटक गोव्यात दाखल झाले आहेत. विशेषतः कुटुंब, समूहाने येणारे पर्यटक अधिकतर दिसत आहेत. देशी पर्यटकांचा पणजीत आल्यानंतर सध्या ओढा आहे, तो चर्च स्क्वेअर, मळा आणि फोन्तेईन्हास भागातील जुन्या पोर्तुगीजकालीन घरांच्यामधील रस्त्यावरून छायाचित्रे काढण्यासाठी.

गोव्यात सर्वाधिक पर्यटकांची संख्या ही देशातील विविध राज्यांतून येणाऱ्यांची असते. विदेशी पर्यटकांची संख्या यावर्षी वाढण्याची शक्यता आहे. रशिया व इतर देशांतून गोव्याकडे पर्यटक येतील, अशी आशा पर्यटन खात्याला आहे.

मात्र, देशी पर्यटकांमध्ये गोव्याचे आकर्षण असल्याने एकदा तरी गोव्याला भेट देण्याच्या निमित्ताने पर्यटक येत आहेत. अगदी बिहार ते केरळ आणि पुद्दुचेरीपासून पर्यटक स्वतःच्या वाहनाने गोव्यात पर्यटनाचा आनंद लुटण्यासाठी येत असल्याचे दिसते.

पणजीत सध्या उशिरापर्यंत पर्यटक रस्त्यावर दिसत आहेत. मागील काही वर्षांत पणजीतील व्यवहाराची परिभाषाच बदलून गेली आहे. राजधानी पणजीला लागून असलेल्या मांडवी नदीतील कॅसिनोंचाही चाहता पर्यटक वर्ग अनेक राज्यांत आहे. कॅसिनोंचे आकर्षण असल्याने त्यानिमित्ताने सुट्टीची मजा लुटण्यासाठी येणारा पर्यटक वर्गही पाहायला मिळतो.

अनेक जाहिरातींमध्ये गोवा दाखवायचा झाल्यास सध्या पणजीतील चर्च स्क्वेअर, मळा परिसर दाखविला जातो, त्यामुळे गोव्यात येणारा पर्यटक याठिकाणी भेट देतोच. मागील काही वर्षांत सिंघम चित्रपटामुळे दोनापावला हे ठिकाण प्रसिद्ध झाले होते; पण आता पणजीत येणारा पर्यटक चर्च स्क्वेअर आणि मळा परिसरात येऊन जातोच.