पणजी: अन्नावरुन झालेल्या वादात कन्सट्रक्शन इमारतीवरील कामगाराचा खून झाल्याची घटना उघडकीस आली आहे. याप्रकरणी संशयित आरोपीला पणजी पोलिसांनी दोन तासांत अटक केलीय. भाटले येथील राम मंदिराजवळ सोमावारी (०९ डिसेंबर) रात्री नऊच्या सुमारास ही घटना उघडकीस आली.

जॉन (पूर्ण नाव समोर आलेले नाही) असे खून झालेल्या कामगाराचे नाव आहे. याप्रकरणी कंत्राटदार नाजीर मुल्ला (वय ४५, रा. सांतिनेज, पणजी) यांनी पणजी पोलिस स्थानकात गुन्हा नोंद केला. गुन्हा नोंद झाल्यानंतर पोलिसांनी घटनास्थळावरील सीसीटीव्ही तपासून संशयित अरविंद तिवारी (वय ३८, रा. लखनऊ, उत्तर प्रदेश) याला अटक केली.

तक्रार दाखल झाल्यानंतर अवघ्या दोन तासांत पोलिसांनी प्रकरणाचा छडा लावून संशयित आरोपीला अटक केली. संशयित तिवारी विरोधात भारतीय न्याय संहिता कलम १०३ अंतर्गत गुन्हा नोंद करण्यात आला आहे. तिवारीला पणजी येथील योग सेतू जवळून अटक करण्यात आली.

पणजी पोलिसांनी दिलेल्या माहितीनुसार, अन्नावरुन झालेल्या किरकोळ वादातून अरविंद तिवारी याने कामगार जॉनचा खून केला. धारदार हत्याराने त्याने जॉनचा गळ्यावर वार केल्याचे समोर आले आहे. पोलिसांनी संशयिताला ताब्यात घेतले असून अधिक तपास सुरु आहे.