रुग्ण नोंदणी, रुग्णवाहिकांची कमतरता, रुग्णांकडून ऑनलाइन पेमेंट न स्वीकारणे आणि बेडची कमतरता या मुद्द्यांवर चर्चा करण्यासाठी हॉस्पिसियो दक्षिण गोवा जिल्हा रुग्णालयाचे वैद्यकीय अधीक्षक डॉ. राजेंद्र बोरकर यांची भेट घेतली. "लाल फितीचा" कारभार हेच सर्व इस्पितळाच्या सर्व समस्यांचे कारण आहे, असे माझे ठाम मत आहे. आरोग्यमंत्री विश्वजीत राणे यांनी याची त्वरित दखल घेऊन परिस्थिती सुरळीत करावी, अशी मागणी युवा नेते प्रभव नायक यांनी केली आहे.

वैद्यकीय अधीक्षकांसोबत झालेल्या बैठकीनंतर प्रसारमाध्यमांशी बोलताना नायक यांनी मी काही सूचना केल्या असून रुग्णांच्या अडचणी कमी करण्यासाठी त्यांची अंमलबजावणी करण्याचे आश्वासन वैद्यकीय अधीक्षकांनी दिले आहे, असे त्यांनी स्पष्ट केले.

दक्षिण गोवा जिल्हा रुग्णालयाकडे सध्या फक्त २ रुग्णवाहिका आहेत. या रुग्णवाहिका हृदयविकाराच्या आणि नवजात बालकांच्या रुग्णांसाठी दिल्या वापरल्या जात आहेत. अपघाती रुग्णांसह इतर सर्व रुग्णांना १०८ रुग्णवाहिकेद्वारेच नेले जाते. आरोग्यमंत्री विश्वजित राणे यांनी ताबडतोब दोन रुग्णवाहिका देण्याचे तसेच इतर काहीजणांनी अशाच रुग्णवाहिका देण्याचे जाहीर केले होते, परंतु आतापर्यंत एकही नवीन रुग्णवाहिका इस्पितळाकडे आलेली नसल्याचे समजते, असे नायक यांनी नमूद केले.

वैद्यकीय अधीक्षकांनी मला ओपीडीमध्ये सुरू असलेली व्यवस्था समजावून सांगितली. त्यांच्या म्हणण्याप्रमाणे, दिव्यांग व्यक्ती, गर्भवती महिलांना ओपीडीमध्ये थेट प्रवेश दिला जातो. ज्येष्ठ नागरिक आणि इतर रुग्णांसाठी बसण्यासाठी लॉबीमध्ये जवळपास ३०० खुर्च्या उपलब्ध आहेत. रुग्ण आणि नातेवाईक तपासणी होणार नाही का या चिंतेने घाबरून गर्दी करतात. यावर तोडगा काढण्यासाठी इस्पितळ प्रशासनाकडून दखल घेतली जाईल असे त्यांनी सांगितले. दक्षिण गोवा जिल्हा इस्पितळ पूर्णपणे कार्यांवित व्हावे यासाठी तसेच सदर इस्पितळाला टर्शियरी इस्पितळ म्हणून मान्यता मिळावी यासाठी सर्वांच्या सहकार्याने मी सरकार दरबारी पाठपुरावा करीत राहीन, असे नायक यांनी सांगितले.

ऑनलाइन किंवा डिजिटल पेमेंटबाबत निर्णय

दक्षिण गोवा जिल्हा इस्पितळात रुग्णांकडून ऑनलाइन किंवा डिजिटल पेमेंट स्वीकारले जात नाही, ही धक्कादायक बाब आहे. आरोग्यमंत्री विश्वजित राणे यांनी तातडीने फाइल क्लिअर करून ऑनलाइन पेमेंट सुविधा सुरू करावी, अशी मागणी प्रभव नायक यांनी केली.

१५० खाटांची गरज

हॉस्पिसिओ हॉस्पिटलमध्ये खाटांच्या तीव्र टंचाईमुळे वैद्यकीय कर्मचाऱ्यांना येणाऱ्या अडचणी मला समजल्या आहेत. आता फक्त ३५० खाटा आहेत आणि सुमारे १५० खाटांची तातडीची गरज आहे. त्याच बरोबर आवश्यक मनुष्यबळ देणे सरकारचे कर्तव्य आहे, असे प्रभव नायक यांनी सांगितले.