सासष्टी: फातोर्डेचे आमदार तथा गोवा फॉरवर्ड पक्षाचे अध्यक्ष विजय सरदेसाई यांनी राज्याच्या मुख्य सचिवांना पत्र लिहून डायोसेशन सोसायटीच्या १३८ शाळांतील ४५८ शिक्षक व शिक्षकेतर कर्मचाऱ्यांना थकीत पगार तात्काळ देण्याची विनंती केली आहे. या शिक्षकांचा व शिक्षकेतर कर्मचाऱ्यांचा थकीत पगाराचा विषय हल्लीच झालेल्या विधानसभा अधिवेशनात उपस्थित केला होता.

मुख्यमंत्र्यांनी त्यांचा थकीत पगार देण्याचे आश्वासन दिले होते. मात्र, अजून त्याबाबत प्रक्रिया सुरू न झाल्याचे आपल्याला कळले आहे, असे सरदेसाई यांनी पत्रात नमूद केले आहे. मंगळवारी मडगावात पत्रकारांशी बोलताना सरदेसाई यांनी सांगितले की, गोव्यातील शिक्षण क्षेत्रात अंधाधुंदी कारभार सुरू आहे. शि शिक्षण क्षेत्रात भाजपने राजकारण आणले आहे, असा आरोप त्यांनी केला.

पूल बांधणे म्हणजे विकास नव्हे !

गोव्यात शिक्षणाचा दर्जा घसरत चालला आहे व पुढील पिढीसाठी ही धोक्याची घंटा आहे, असे सांगून सरदेसाई म्हणाले की, पूल बांधणे म्हणजे विकास नव्हे. पेपरफुटी, वशिलेबाजी, शिक्षितांना नोकरी न मिळणे हे वाईट द्योतक आहे, असेही त्यांनी सांगितले. आरोग्य व शिक्षण क्षेत्र मजबूत असेल, तर राज्याचा विकास होत असतो, असेही सरदेसाई यांनी सांगितले.