पेडणे: कासारवर्णे पंचायत क्षेत्रातील बैलपार नदी शेजारी जलसिंचन खात्यामार्फत 27 कोटी रुपये खर्च करून पंप हाउस बांधण्याचे बांधकाम युद्ध पातळीवर चालू आहे. ते बांधकाम बेकायदा असल्याचा दावा करत पंचायतीने संबंधित खात्याला काम बंद ठेवण्यासाठी नोटीस पाठवली.

विधानसभेच्या निवडणुकीपूर्वी या बांधकामाचा शुभारंभ सरपंच रमेश पालयेकर यांच्या उपस्थिती उपमुख्यमंत्री बाबू आजगावकर यांच्या हस्ते करण्यात आला होता. आता तेच सरपंच हे बांधकाम बेकायदा ठरवून बंद करण्यासाठी नोटीस पाठवत आहेत. त्याबद्दल नागरिक संभ्रमात पडले आहेत. तर दुसऱ्या बाजूने शनिवारपर्यंत हे बांधकाम बंद केले नाही, तर या विरोधात धरणे आंदोलन धरण्याचा इशारा मोपा पंचक्रोशी पिडीत जन संघटनेने दिला आहे.

पावसाळ्यात बैलपार नदीला महापूर येतो, त्यात भर पडते, ती तिळारीचे पाणी भरल्यानंतर सोडले जाते, त्या दिवशी तर पूर्ण बैलपार पूल परिसरातील घरांना धोका संभवत असतो. मुख्य रस्ते पाण्याखाली जातात. लोकांचा संपर्क तुटतो. काही लोकांना पूरग्रस्त भागातून हलवावे लागते. बैलपार नदीवर जो जुना बंधारा आहे. तेथे वाहून येणारी लाकडे अडकतात आणि पाणी वाट मिळेल, तसे ते मुख्य रस्त्यावर येते. तो बंधारा काढावा, अशी मागणी स्थानिकांनी निवडणुकीपूर्वी उपमुख्यमंत्री बाबू आजगावकर यांच्याकडे केली होती. नदी किनारी 27 कोटी रुपये खर्च करून पंप हाउस उभारण्याचे काम सुरू झाले.

शेतकऱ्यांचे उपोषण मागे!

बैलपार-कासारवर्णे येथील प्रकल्पाबाबत 28 रोजी जलसोत्र खात्याच्या अभियंते स्थानिकांशी चर्चा करणार आहेत. त्यामुळे या ठिकाणी सुरू असलेले उपोषण मागे घेण्यात आले. शेतकरी व ग्रामस्थांची या प्रकल्पाला विरोध दर्शविण्यासाठी आज हे उपोषण सुरु केले होते. या उपोषणात उदय महाले, बाबूराव गाड व कुटुंबीय, सागर गाड तसेच गावातील पुरूष व महिलांनी या उपोषण आंदोलनात भाग घेतला. सोमवारी अभियंत्यासोबतच्या चर्चेनंतर पुढील निर्णय घेण्यात येणार असल्याचे आंदोलन कर्त्यानी सांगितले..

पुलाच्या कठड्यांना धोका

या कामामुळे बैलपार पुलाच्या कठड्याना धोका निर्माण झाला असून, ठीक ठिकाणी भेगा पडलेल्या दिसत आहे. त्यामुळे पावसाळ्यात पाण्याच्या दाबामुळे पुलाला हानी संभवते. हा धोक्या लक्षात घेऊन संबंधितांनी हा प्रकल्प बंद करावा, अशी स्थानिकांची मागणी आहे.