पणजी: धारगळमध्‍ये येत असलेल्‍या डेल्‍टीन कॅसिनोसाठीची ३३ हेक्‍टर मिळून ३६.०५ हेक्‍टर जमीन ओलिताखालील क्षेत्रातून (काडा) वगळण्‍याचा तसेच विविध ठिकाणची २९२ हेक्‍टर जमीन ‘काडा’अंतर्गत आणण्‍याचा निर्णय राज्‍य सरकारने घेतला असून, लवकरच त्‍यावर शिक्‍कामोर्तब होणार असल्‍याची माहिती सरकारी सूत्रांनी दिली. सरकारच्‍या या निर्णयानंतर डेल्‍टीन कंपनीचा धारगळमध्‍ये कॅसिनो आणण्‍याचा मार्ग मोकळा होणार आहे.

राज्‍यातील पेडणे, डिचोली, बार्देश तालुक्‍यातील तिलारी प्रकल्‍पाच्‍या कमांड क्षेत्रातील हजारो एकर जमीन ‘काडा’अंतर्गत घेण्‍यात आलेली आहे. त्‍यातील धारगळ, कळंगुट, पर्रा, आसगाव, हणजुणे, लाटंबार्से, सर्वण, तोरसे, मये आणि डिचोली या भागांतील ३६.०५ हेक्‍टर जमीन ‘काडा’तून वगळण्‍याचा तसेच डिचोली आणि पेडणे तालुक्‍यांतील मये, पेडणे, कोरगाव आणि पालये येथील २९२ हेक्‍टर जमीन ‘काडा’ अंतर्गत आणण्‍याचा निर्णय सरकारने घेतला आहे.

काहीच दिवसांपूर्वी झालेल्‍या ‘काडा’च्‍या बैठकीतही याबाबत सविस्‍तर चर्चा झालेली आहे, असेही सूत्रांनी सांगितले.

पावसाळी अधिवेशनात गाजला होता विषय

डेल्‍टीनच्‍या कॅसिनोसाठीच धारगळमधील ३ लाख चौरस मीटर जमीन ‘काडा’तून रद्द केल्‍याचा दावा विरोधी पक्षनेते युरी आलेमाव यांनी पावसाळी अधिवेशनात केला होता.

त्‍यावर अजूनपर्यंत ‘काडा’ने हे क्षेत्र अधिकृतपणे रद्द केलेले नाही. धारगळमधील ३३ हेक्टर जमीन शेतकऱ्यांनीच खासगी संस्थांना विकली आहे. ही जमीन नंतर डेल्टीन कंपनीने विकत घेतली. डेल्टीननेच ‘काडा’कडे कमांड क्षेत्रातून वगळण्यासाठी अर्ज करण्यात केला होता. मात्र ‘काडा’ने अंतिम निर्णय घेतलेला नसल्‍याचे मंत्री शिरोडकर यांनी त्‍यावेळी स्पष्ट केले होते.