मुंबई: तांत्रिक बिघाडामुळे दिल्लीतून गोव्याकडे येणारे विमान मुंबईला वळविण्यात आले. इंडिगो कंपनीचे 6E 6271 विमान दिल्लीतून गोव्यातील मनोहर आंतरराष्ट्रीय विमानतळावर येत असताना ही घटना घडली. तांत्रिक बिघाडानंतर विमान मुंबईतील छत्रपती शिवाजी महाराज आंतरराष्ट्रीय विमानतळावर उतरविण्यात आले.

इंडिगो कंपनीने दिलेल्या माहितीनुसार, कंपनीचे ६ई ६२७१ विमानाने दिल्लीतून गोव्यासाठी उड्डाण घेतले. हे विमान गोव्यातील मनोहर आंतरराष्ट्रीय विमानतळावर उतरणार होते. विमानात तांत्रिक बिघाड झाल्यानंतर विमान तात्काळ मुंबईतील छत्रपती शिवाजी महाराज आंतरराष्ट्रीय विमानतळावर उतरविण्यात आले.

विमानाची आवश्यक ती तांत्रिक तपासणी व देखभाल - दुरुस्ती केल्यानंतरच विमानाचे उड्डाण होईल. प्रवाशांसाठी पर्यायी विमानाची व्यवस्था करण्यात आली असून, लवकरच हे विमान प्रवाशांना घेऊन उड्डाण घेईल, अशी माहिती कंपनीच्या वतीने देण्यात आली आहे.