Margao Corporation :

सासष्टी, फेस्त फेरीतील सोपो गोळा करून १७.५० लाख रुपये परस्पर आपल्या खात्यात जमा करून गैरवापर केल्याप्रकरणी मडगाव नगरपालिकेतील कारकून योगेश शेटकर याच्याविरुद्ध कायदेशीर सल्ला घेऊन कारवाई करण्याचा निर्णय आज मडगाव पालिका मंडळाच्या खास बैठक घेण्यात आला.

या बैठकीत घनश्याम शिरोडकर, पुजा नाईक, सगुण ऊर्फ दादा नायक, राजू नाईक, सदानंद नाईक, महेश आमोणकर, डॉ. सुशांता कुरतरकर उपस्थित होते. सोपो गोळा करण्याची ज्या इतर आठ जणांवर जबाबदारी होती, त्यांना मेमो देण्यात येईल, असाही निर्णय घेण्यात आला आहे. उद्या किंवा मंगळवारी या कारकुनाच्या विरोधात पोलिस तक्रार केली जाईल.

रक्कम वसुल झाली नाही, तर त्याच्या विरोधात न्यायालयात वसुली याचिका सादर केली जाईल, असे नगराध्यक्ष दामोदर शिरोडकर यांनी पत्रकारांना सांगितले.

ही रक्कम वसुल करण्याला आपण सर्वप्रथम प्राधान्य देत असल्याचे नगराध्यक्षांनी सांगितले. ही रक्कम हप्त्याने वसुल करण्यास आपला विरोध असेल, असेही नगराध्यक्षाने सांगितले. या प्रकरणात आणखी कोण कोण आहेत हे पूर्ण चौकशी केल्यानंतरच कळेल, पण नगरपालिकेचे प्रशासन कोलमडले आहे हे या घटनेने सिद्ध झाल्याचे नगराध्यक्षांनी सांगितले.

‘त्या’ कारकूनाने तीन लाख केले परत

मडगाव नगरपालिकेतील ज्या कारकूनाने फेस्त फेरीतून ‘सोपो’ गोळा करुन १७.५० लाख रुपये नगरपालिकेऐवजी आपल्या वैयक्तिक खात्यात जमा करून गैरवापर केला. त्या कारकूनाने आज तीन लाख रुपये परत केले आहेत. आता उरलेले १४.५० लाख रुपये वसूल करण्यासाठी पालिकेला कारवाई करावी लागेल.

प्रतिज्ञापत्र लिहून घेण्याची सूचना

योगेश शेटकर यांचे मुख्याधिकाऱ्यांना लिहिलेले एक पत्र कोणी तरी आणून दिले. त्यात त्याने ही रक्कम आपल्या खात्यात जमा केली हे मान्य केले. आपल्याला ही रक्कम भरण्यासाठी वेळ द्यावा व ती हप्त्यांनी भरण्याची परवानगी द्यावी असे म्हटले आहे. यावेळी योगेशकडून कायदेशीर प्रतिज्ञापत्र लिहून घ्यावे अशी सूचना नगरसेवकांनी केली.

बैठकीत उघड झालेले कारनामे

१ योगेश शेटकर याने बनावट सह्या करून बॅंकांना बनावट पगार प्रमाणपत्र देऊन लाखो रुपयांचे कर्ज घेतले आहे.

२ फेस्त फेरी आयोजनात मुख्याधिकाऱ्यांनी नगराध्यक्षांना विश्र्वासात घेतले नाही. उच्च न्यायालयाच्या आदेशाप्रमाणे फेस्त फेरी आयोजनाची जबाबदारी मुख्याधिकाऱ्यांवर होती, असे मुख्याधिकाऱ्यांचे स्पष्टीकरण.

३ नगराध्यक्षांच्या माहितीनुसार यंदा २९२ स्टॉल्सना परवाना दिला होता. मात्र, बैठकीत २९९ स्टॉल्सना परवाना दिल्याचे उघड झाले.

४ सोपो गोळा करताना पावतीवर नगरपालिका इन्स्पेक्टरची सही होती. काही पावत्यांवर वादग्रस्त कारकुनाची सही असल्याचे बैठकीत सांगण्यात आले.

५त्या कारकुनाच्या म्हणण्याप्रमाणे त्याला रक्कम गोळा करण्यास सांगितले गेले. मात्र, नेमके कोणी सांगितले तसेच त्याला ही रक्कम गोळा करण्याचे अधिकार कोणी दिले?