तिस्क-उसगाव: बुधवारी ( दि. १६ ऑक्टोबर) रोजी मुसळधार पावसामुळे तिस्क-उसगाव येथील साईनगरजवळ ओहोळाच्या पाण्यात पाचवीत शिकणारा मुलगा दर्शन संतोष गांवकर (वय ११) बुडाल्याची दुर्दैवी घटना समोर आली होती आणि आज या लहानग्या मुलाचा मृतदेह अग्निशामक दलाच्या हाती लागला आहे. राज्यात सुरु असलेल्या मुसळधार पावसामुळे उसगावातील ओहोळाला पूर आला होता आणि दर्शन यावेळीच बाकी विद्यार्थ्यांसह ट्यूशनमधून घरी परतत असताना ही घटना घडली.

पावसाच्या पाण्याने तुडुंब भरलेल्या ओहोळाचे पाणी रस्त्यावर आले होते. ओहोळाचे वाढलेले पाणी बघून घाबरलेल्या मुलांनी एकमेकांचा हात धरून ओहोळ ओलांडण्याचा प्रयत्न सुरु केला आणि अचानक हात सुटल्याने दर्शन पाण्याच्या प्रवाहात वाहात गेला.दर्शनच्या बहिणीने प्रसंगावधान राखत इतर दोन मुलांचा जीव वाचवला मात्र दर्शन कुठे आहे अशी चौकशी करताच तो वाहून गेल्याचे सोबत असलेल्या विद्यार्थ्यांनी सांगितले.

या संपूर्ण घटनेची बातमी मिळताच काल रात्री दोन वाजेपर्यंत अग्नीशामक दल व फोंडा पोलिस यांच्याकडून संपूर्ण ओहोळात मुलाचा शोध सुरू होता मात्र त्यांना काही केल्या यश मिळत नव्हते. आज (दि. १७ ऑक्टोबर) पर्यंत पोलीस व अग्निशामक दलाचे प्रयत्न सुरूच होते आणि सकाळी अग्निशामक दलाचे अधीकारी सुशील मोरजकर यांनी बोटीच्या साहाय्याने दूधसागर खांडेपार नदीत पुन्हा शोध घेतला असता ११च्या सुमारास या लहानग्या मुलाचा मृतदेह पाण्यात तरंगताना आढळला.

फोंडा पोलिसांनी या घटनेचा पंचनामा केला असून मृतदेह शवचिकित्सेसाठी मडगाव येथील हॉस्पिसियो येथे पाठवण्यात आला आहे आणि या घटनेचा अधिक तपास पोलिसांकडून सुरु आहे.