Davorlim Murder Case: सादिक बेळ्ळारी खून प्रकरणातील सातवा संशयित आरोपी गज्जू हा अजूनही फरार असून तो पोलिसांना सापडलेला नाही. पोलिस त्याच्या मागावर आहेत. तो कर्नाटकात पळून गेल्याचा संशय असून संशयित वारंवार जागा बदलत आहे.

दरम्यान, या खून प्रकरणात अटक केलेल्या अन्य सहाही संशयितांची न्यायालयीन कोठडीत रवानगी करण्यात आली आहे. एक सप्टेंबर रोजी रुमडामळ गृहनिर्माण वसाहतीत आपल्या घरात झोपलेल्या सादिकचा निर्घृण खून करण्यात आला होता.

दोन वर्षांपूर्वी भगवती कॉलनी येथे मुजाहिद खानजादे याच्या खुनाचा बदला म्हणून सादिकचा खून करण्यात आल्याचे तपासात उघड झाले. या खून प्रकरणात मायणा कुडतरी पोलिसांनी आत्तापर्यंत कादर खान, तौसिफ कडेमणी, जावेद पानवाले, रेहाल पानवाले, सुलेमान सिंकदर व कबीर खानजादे या सहाजणांना अटक केली.

संशयितांनी सादिकचा खून करण्यासाठी वापरलेले हत्यार पाडी येथून पोलिसांनी ताब्यात घेतले. भादसंच्या ३०२ व १२० (ब) कलमाखाली पोलिसांनी संशयितांवर गुन्हा नोंद केला आहे.