मडगाव: मडगावचे प्रसिद्ध व्यापारी आणि भंडारी समाज चळवळीतील नेते दामोदर नामदेव आडपईकर (Damodar Adpaikar) (71) यांचे आज सकाळी अल्प आजाराने निधन झाले. आजच त्यांच्यावर मडगाव स्मशानभूमीत अंत्यसंस्कार करण्यात आले.

काल रात्री त्यांना हृदयविकाराचा झटका आल्याने त्यांना मडगावात एका खासगी इस्पितळात भरती करण्यात आले होते. तिथे त्यांच्यावर उपचार चालू असताना आज सकाळी निधन झाले. त्यांच्यामागे पत्नी दीप्ती, पुत्र दिपराज व दीपकुमार तसेच अन्य परिवार आहे.

मूळ आडपई येथील पण व्यवसायानिमित्त फातोर्डा येथे स्थाईक झालेले आडपईकर हे भंडारी चळवळीतील नेते होते. मडगाव बाजारात त्यांचे दुकान असून मडगावच्या सामाजिक कार्यातही त्यांच्या सक्रिय सहभाग होता. मडगाव शिगमोत्सव उत्सवाचे ते संस्थापक सदस्य होते. मडगाव बाजारकर मंडळाचेही ते सक्रिय कार्यकर्ते होते. एक चांगले हौशी नाट्य कलाकार म्हणूनही त्यांना ओळखले जात होते.