मोयारा येथील बंधाऱ्याला मोठे भगदाड पडले असून खारे पाणी घुसल्यामुळे शेत जमीन व भाजी पिकांचे नुकसान झाले आहे. बंधाऱ्याच्या दुरुस्तीकडे सरकारने दुर्लक्ष केल्याने या बंधाऱ्याच्या दुरूस्तीसाठी जलस्रोत मंत्र्यांची मदत घेण्याचा निर्णय शेतकरी संघटनेने घेतला आहे.

नदीच्या पाण्यापासून मोयारातील शेत जमिनीचे संरक्षण या बंधाऱ्यामुळे होते. परंतु हा बंधारा आता कमकुवत बनला आहे. बंधाऱ्याला विविध ठिकाणी वारंवार भगदाड पडत असल्याने नदीचे खारे पाणी शेतात घुसते. सध्या शेतीत हे पाणी शिरल्याने मोठ्या प्रमाणात शेतजमीन बाधित झाल्याचे शेतकऱ्यांनी सांगितले.

आताफोंड असोसिएशनने तीन किलोमीटरचा हा बंधाऱ्याचा भाग साफ करण्याचे काम हाती घेतले आहे आणि त्याची दुरुस्ती केली. तरीही वारंवार भगदाडे पडत आहेत. त्यामुळे शेतकऱ्यांना शेतीची मशागत करणे कठीण बनले आहे. परिणामी पीक खराब होत आहे. हा भगदाड पडलेला बंधारा दुरूस्तीकडे प्रशासकीय यंत्रणा लक्ष देत नाही. त्यामुळे आम्ही आता जलस्त्रोत मंत्र्यांकडे दाद मागण्याची निर्णय घेतला आहे, अशी माहिती टेनंट असोसिएशनचे अध्यक्ष फिलीप डिसोझा यांनी दिली.