पणजी: किनारी क्षेत्र व्यवस्थापन प्राधिकरणाचा (सीझेडएमए) अधिकारी असल्याचे भासवून आसोळणा येथील एका व्यक्तीची १.४९ लाख रुपयांची फसवणूक करण्यात आली. दरम्यान, राज्यात दिवसभरात सायबर फसवणुकीच्या पाच घटना उघडकीस आल्या असून, पाच जणांना तब्बल ११.९५ लाख रुपयांचा गंडा घालण्यात आला आहे.

गोमंतकीयांनी सायबर फसवणुकीला बळी पडू नये, यासाठी राज्य सरकारकडून विविध माध्यमांतून जनजागृती केली जात आहे. तरीही, आमिषाला बळी पडून नागरिकांची फसवणूक होण्याचे प्रकार सुरूच आहेत. राज्यात नव्याने उघडकीस आलेल्या पाच प्रकरणांत सायबर भामट्यांनी वेगवेगळ्या पद्धतींचा वापर करून पाच जणांना लाखो रुपयांचा गंडा घातल्याचे समोर आले आहे.

पहिल्या प्रकरणात, ९ जून रोजी मडगावातील एका महिलेला सायबर भामट्याने एपीके फाइल डाऊनलोड करण्यास प्रवृत्त केले. ती फाइल डाऊनलोड केल्यानंतर तिच्या मोबाईल फोनमधील संपूर्ण माहिती संशयिताच्या हाती लागली. त्यानंतर संबंधित महिलेच्या बँक खात्याशी जोडलेल्या मोबाईल क्रमांकावर काही संदेश आले. मात्र, तिने त्याकडे दुर्लक्ष केले.

त्यानंतर नेट बँकिंग आणि यूपीआयच्या माध्यमातून तिच्या बँक खात्यातून पाच अनधिकृत व्यवहार झाल्याचे आढळून आले. त्यातून सुमारे ६.५१ लाख रुपये गायब झाल्याचे लक्षात आल्यानंतर तिने पोलिसांत धाव घेतली.

दुसऱ्या प्रकरणात, किनारी क्षेत्र व्यवस्थापन प्राधिकरणाचा (सीझेडएमए) अधिकारी असल्याचे भासवून आसोळणा येथील एका व्यक्तीची फसवणूक करण्यात आली. पीडित व्यक्तीने दाखल केलेल्या तक्रारीनुसार, २७ जुलै रोजी त्यांना एका व्यक्तीचा व्हॉट्सॲप कॉल आला. त्याने आपण ‘सीझेडएमए’चा अधिकारी असल्याचे सांगत, तक्रारदाराच्या व्यवसायाशी संबंधित समस्या सोडवून देण्याच्या बहाण्याने पैसे मागितले.

त्यानुसार तक्रारदाराने संशयिताच्या बँक खात्यांत ऑनलाइन पद्धतीने सुमारे १.४९ लाख रुपये हस्तांतरित केले. मात्र, नंतर आपली फसवणूक झाल्याचे लक्षात येताच त्यांनी कुंकळ्ळी पोलिस ठाण्यात धाव घेतली. पोलिस या प्रकरणी पुढील तपास करीत आहेत.

तिसऱ्या प्रकरणात, ‘ओएनजीसी’मध्ये नोकरी देण्याचे आमिष दाखवून सायबर भामट्यांनी सारझोरा येथील एका महिलेची सुमारे १.०६ लाख रुपयांची फसवणूक केली. ‘ओएनजीसी’तील रिक्त पदांसाठी अर्ज मागविणारी वर्तमानपत्रातील जाहिरात पाहिल्यानंतर संबंधित महिलेने जाहिरातीत दिलेल्या संकेतस्थळावर आपला ई-मेल आयडी आणि व्हॉट्सॲप क्रमांक नोंदविला. त्यानंतर ‘ओएनजीसी’चा प्रतिनिधी असल्याचे सांगणाऱ्या एका व्यक्तीचा तिला फोन आला.

त्याने नोकरीचे आश्वासन देत तिला विविध कारणांसाठी पैसे भरण्यास प्रवृत्त केले. ऑफर खरी असल्याचे समजून संबंधित महिलेने संशयिताने दिलेल्या खात्यांवर ऑनलाइन पद्धतीने सुमारे १.०६ लाख रुपये हस्तांतरित केले. मात्र, त्यानंतर आपली फसवणूक झाल्याचे तिच्या लक्षात आले.

क्रेडिट कार्ड मर्यादेचे आमिष अंगलट!

‘एसबीआय’चा क्रेडिट कार्ड अधिकारी असल्याचे भासवून एका सायबर भामट्याने सांगे येथील एका महिलेची १.४७ लाख रुपयांची फसवणूक केली. २८ जुलै रोजी तिला एका अनोळखी व्यक्तीचा फोन आला. त्या व्यक्तीने तिच्या क्रेडिट कार्डची मर्यादा २.१४ लाख रुपयांवरून ३.१४ लाख रुपयांपर्यंत वाढवून देण्याचे आमिष दाखवले. त्यानंतर तिची फसवणूक करण्यात आली.