सासष्टी: कुटबण मच्‍छीमारी जेटीवरील वाढत्या आरोग्यविषयक समस्या सोडविण्यासाठी उपजिल्हाधिकारी लक्ष्मीकांत देसाई यांच्या मार्गदर्शनाखाली जेटीवर संबंधितांची बैठक घेण्यात आली. तसेच परिसराची पाहणी करून संबंधितांना आवश्‍यक त्‍या सूचना करण्‍यात आल्‍या.

या बैठकीला वेळ्‍ळी सरपंच वीणा कार्दोझ, मत्स्यव्यवसाय खात्याच्या सुनीता पावसकर, आरोग्य खात्याच्या डॉ. बनेदीता डायस, मामलेदार, विविध खात्यांचे अधिकारी तसेच ‘गोवा कॅन’चे प्रतिनिधी उपस्थित होते.

डॉ. डायस यांनी सांगितले की, आतापर्यंत १६५५ खलाशांची तपासणी करण्यात आलेली आहे. त्‍यातून कॉलराची १३ प्रकरणे आढळली असून या सर्वांवर उपचार सुरू आहेत. आवश्‍‍यक खबरदारी घेऊनही कॉलरा व डायरियाचे रुग्ण सापडले याचे एक कारण म्‍हणजे दोघे-तिघे खलाशी मजूर गावांतून येताच त्यांना त्रास जाणवू लागला. आम्ही त्यांना शौचालयातून हात स्‍वच्‍छ साबणाने धुण्‍याचा तसेच पाणी उकळून पिण्‍याच्‍या सूचना केल्‍या आहेत, असेही त्‍यांनी सांगितले.

सरपंच वीणा कार्दोझ म्‍हणाल्‍या की, गेल्या वर्षीच्या घटनांनंतर सर्वतोपरी खबरदारी यावेळी घेण्‍यात आली आहे. ही समस्‍या मासेमारी मोसमाच्या सुरवातीलाच निर्माण होते. एकदा मजूर ट्रॉलरवरून समुद्रात गेले की समस्‍या जाणवत नाही.

आता वर्षभर मजुरांची तपासणी केली जाते. पाण्याचा त्रास त्यांना जाणवत असावा अशी शंकाही त्यांनी व्यक्त केली. येथे पाणी टॅंकरमधून आणले जाते. मात्र ट्रॉलरवरील पाण्याची त्यांना बाधा होण्याची शक्यता आहे.