केपे: शेळवण-कुडचडे येथे जुवारी नदीत होऊ घातलेल्या दोन जेटींना कुडचडेवासीयांनी तीव्र विरोध केला. त्यांनी आमदार निलेश काब्राल यांची भेट घेऊन ही जेटी कोळसा हाताळण्यासाठी असून आम्हाला ही जेटी कोणत्याही परिस्थितीत नको, अशी मागणी केली. काब्राल यांनीही आपण लोकांबरोबर असल्याचे स्पष्ट करीत जे प्रकल्प लोकांना नको, ते आपल्यालाही नको असे सांगितले.

शेळवण कुडचडे येथे जुवारी नदीवर दोन जेटीचे बांधकाम केवळ कोळसा हाताळण्यासाठी होणार असल्याची भीती स्थानिकांनी व्यक्त करीत आमच्या गावात ही जेटी होऊ देणार नसल्याचे सांगितले.

या जेटींना पूर्वीपासून विरोध असून आता पुन्हा एकदा हा प्रश्न उपस्थित झाल्याने लोकांच्या मनात भीती निर्माण झाली असल्याचे मनोज नाईक यांनी सांगितले. आम्ही राष्ट्रीय हरित लावादात गेलो असून या जेटींचे काम चालीस लावण्याचा प्रयत्न होत असल्याने आमदारांनी यात हस्तक्षेप करून हे काम बंद पाडावे अशी मागणी यावेळी नाईक यांनी केली.

शेळवण गावात ‘रेल्वे ओव्हर ब्रिज’ चे काम होणार होते पण पुलाची रुंदी पाहता  मोठ्या प्रमाणात कोळसा वाहतूक होणार आहे, याबाबत लोकांना संशय आल्याने   त्यांनी या पुलाला विरोध केला होता. स्थानिक लोकांना या भागात कोळसा कोणत्याही परिस्थितीत नकोय, आमदारांनीही हा प्रकल्प बंद करण्यासाठी प्रयत्न करावेत, असे सरपंच किस्तोद फर्नांडीस यांनी सांगितले. यावेळी जिल्हा पंचायत सदस्य सिद्धार्थ गावस देसाई तसेच इतर स्थानिक लोकांनी याविषयी आपले विचार व्यक्त केले.