कुडचडेचे नगराध्यक्ष प्रदीप नाईक यांनी अलिखित करारानुसार एक वर्षाचा कार्यकाळ पूर्ण झाल्याने पदाचा राजीनामा पालिका प्रशासन संचालनालयाकडे सुपूर्द केला.दरम्यान, उपनगराध्यक्षा ऋचा सुभाष वस्त या गेल्या तीन वर्षांपासून त्या पदावर कार्यरत असून त्यांनीही पदाचा राजीनामा दिल्याची माहिती पालिका सूत्रांनी दिली.

अलिखित करारानुसार, पहिल्या वर्षी नगरसेवक विश्वास सावंत, दुसऱ्या वर्षी जस्मिन ब्रागांझा यांनी नगराध्यक्षपद भूषविले होते. त्यानंतर प्रदीप नाईक यांनी विद्यमान मंडळाच्या कार्यकाळातील तिसरे नगराध्यक्ष म्हणून १४ जुलै, २०२३ रोजी पदाची सूत्रे हाती घेतली होती. त्यांचा कार्यकाळ यंदा १५ जुलै रोजी पूर्ण झाल्याने त्यांनी मंगळवारी राजीनामा दिला.

प्रदीप नाईक म्हणाले,की सदर पद हाताळताना व्यापार परवान्यांच्या विषयात लक्ष घालून कुडचडेत सदर परवान्याविना व्यापार करणाऱ्या अंदाजे ३०० व्यापाऱ्यांशी संपर्क साधला आणि आवश्यक सोपस्कार पूर्ण करून १२० व्यापाऱ्यांना परवाने देण्यात आले. शिवाय त्यांच्याकडून थकबाकीही वसूल केली.