केपे: कुडचडे येथील कचरा प्रक्रिया प्रकल्पातून सोडण्यात येणारे सांडपाणी जवळच्या नाल्यात सोडले जात असल्याचा आरोप स्थानिक नागरिकांनी केला आहे. हे पाणी करमलीवाडा परिसरातून वाहणाऱ्या ओहोळात मिसळल्याने मासे मोठ्या प्रमाणात मृत्युमुखी पडल्याची घटना उघडकीस आली आहे.

कुडचडेचे माजी नगरसेवक पुष्कल सावंत देसाई यांनी या ठिकाणी जाऊन याविषयी कचरा प्रक्रिया प्रकल्पातील अधिकाऱ्यांना जाब विचारला. गेल्या काही दिवसांपासून ओहोळातील पाण्याचा रंग बदलल्याचे तसेच दुर्गंधी येत असल्याचे निदर्शनास आले होते. त्यानंतर ओहोळाच्या विविध ठिकाणी मृत मासे तरंगताना दिसल्याने नागरिकांमध्ये चिंतेचे वातावरण निर्माण झाले आहे. हे पाणी सावंत देसाई यांनी तपासणीसाठी पाठविण्यात येणार असल्याचे सांगितले.

यापूर्वीही दोनवेळा प्रकार उघडकीस: पणजी येथील मळा तलावात ११ एप्रिल रोजी मोठ्या प्रमाणात मासे मृत झाल्याची घटना घडली होती.

तलावाच्या जलाशयात हजारोहून अधिक मृत मासे तरंगताना आढळले होते. तलावाच्या आजूबाजूच्या वस्तीतील सांडपाणी जलाशयात मिसळल्याने ऑक्सिजनची पातळी अत्यंत कमी झाली आणि माशांचा मृत्यू झाला. या घटनेची गोवा खंडपीठाने स्वेच्छा दखल घेत जनहित याचिका दाखल केली होती.

त्यानंतर महापालिकेला तलावात सांडपाणी सोडणारे अनधिकृत मार्ग बंद करण्याची कारवाई करावी लागली. शिवाय कांपाल येथील तलावातही मागील महिन्यात काही प्रमाणात मृत मासे आढळले होते.

चौकशीची मागणी

या घटनेमुळे पर्यावरणीय हानी होत असून परिसरातील जलस्रोत दूषित होण्याचा धोका निर्माण झाला आहे. कुडचडे आरोग्य खात्याच्या अधिकाऱ्यांनी याठिकाणी भेट देऊन पाहणी करावी तसेच संबंधित खात्याने तातडीने पाण्याचे नमुने तपासणीसाठी घेऊन मासे मृत्यूचे नेमके कारण शोधावे तसेच कचरा प्रक्रिया प्रकल्पातून सोडल्या जाणाऱ्या पाण्याची तपासणी करावी, अशी मागणीही स्थानिकांनी केली आहे.