मडगाव: कुंकळ्ळी येथे एका घराची भिंत पाडण्याचे काम चालू असताना ती कोसळून चोवीस वर्षीय कामगाराचा दुर्दैवी मृत्यू झाला. मोहम्मद साबिर असे या कामगाराचे नाव असून तो मूळ बिहार राज्यातील होता. रोजंदारीवर तो काम करीत होता, अशी माहिती कुंकळ्ळी पोलिसांनी दिली.

काल बुधवारी सकाळी साडेनऊ ते दहाच्या दरम्यान नागेलो कुंकळ्ळी येथे ही दुर्घटना घडली. पोलिसांनी दिलेल्या माहितीनुसार, मयत अन्य कामगारांसमवेत क्लोतून आल्मेदा यांच्या जुन्या घराची भिंत पाडण्याचे काम करीत होता.

यावेळी अचानक ती भिंत कोसळून त्याखाली चिरडला गेल्याने मोहम्मद हा गंभीर जखमी झाला. अन्य कामगारांनी त्याला मागाहून बाळ्ळी येथील प्राथमिक आरोग्य केंद्रात नेले असता डॉक्टरांनी त्याला मृत घोषित केले.

निरीक्षक डायगो ग्रासियस यांच्या मार्गदर्शनाखाली उपनिरीक्षक आदित्य सावंत पुढील तपास करीत आहेत. मयताच्या बिहार येथील कुटुंबियांना पोलिसांनी या घटनेविषयी माहिती दिली आहे. ते गोव्यात आल्यानंतर मृतदेह त्यांच्या ताब्यात दिला जाईल. मृतदेह सध्या दक्षिण गोवा जिल्हा इस्पितळाच्या शवागारात ठेवला आहे.