Mining Pit in Bicholim : डिचोलीतील लामगावच्या माथ्यावरील खंदकाला काही प्रमाणात तडा गेल्याची माहिती मिळाली आहे. या पार्श्वभूमीवर मंगळवारी सायंकाळी प्रशासकीय अधिकाऱ्यांनी खाण परिसराची पाहणी करून सुरक्षेचा आढावा घेतला. खाणपिठाला तडा गेला असला, तरी तूर्तास त्यापासून कोणताही धोका नसल्याची माहिती मिळाली आहे. असं असलं तरीही हा तडा वाढत गेल्यास त्यामुळे मोठं नुकसान होऊ शकतं. सध्या प्रशासनाकडून याची पाहणी सुरु आहे.

मात्र, आपत्ती टाळण्यासाठी आवश्यक ती उपाययोजना करण्यात येणार आहे. उत्तर गोवा जिल्हाधिकाऱ्यांच्या आदेशानुसार मंगळवारी सायंकाळी सरकारी अधिकाऱ्यांनी खाण परिसराची पाहणी केल्याचे समजते. खाण आणि भुगर्भ खाते, जिल्हाधिकारी, मामलेदार, पोलिस, अग्निशामक दल, वन आदी खात्याच्या प्रशासकीय अधिकाऱ्यांनी पाहणी केल्याची माहिती मिळाली आहे.

खाण लीजक्षेत्र खाली करण्याची पाळी आल्यामुळे यावर्षी खाणीवर मान्सूनपूर्व प्रतिबंधात्मक उपाययोजना करण्याकडे काहीसी ढिलाई झाली होती. पावसाळ्यात तर मध्यंतरी लामगावच्या माथ्यावरील खाणपीठ तुडुंब भरले होते. तरीदेखील सुदैवाने पावसाळ्यात कोणतीही आपत्ती ओढवली नव्हती.