डिचोली: कोविड रिलीफ योजने (Covid Relief Scheme) अंतर्गत सरकारी अर्थसहाय्य मिळवण्यासाठी डिचोलीतील पारंपरिक व्यावसायिकांची सध्या धावपळ सुरु असल्याचे चित्र दिसून येत आहे. आवश्यक प्रमाणित प्रतिज्ञापत्र मिळवण्यासाठी तर डिचोली मामलेदार कार्यालयात रोज पारंपरिक व्यावसायिकांची गर्दी उडत असल्याचे चित्र सध्या दिसून येत आहे. पारंपरिक व्यावसायिकांची तर आज मामलेदार कार्यालयात प्रचंड गर्दी झाली होती.

'कोविड' काळात अनेक पारंपरिक व्यावसायिक आर्थिक अडचणीत आले आहेत. या व्यावसायिकांना कोविड रिलीफ योजनेंतर्गत सरकारच्या समाज कल्याण खात्यातर्फे अर्थसाहाय्य देण्याची योजना सरकारने अंमलात आणली आहे. या कोविड रिलीफ योजनेंतर्गत पारंपरिक व्यावसायिकांना 5 हजार रुपये अर्थसहाय्य मिळत आहे. तर या योजनेंतर्गत 'कोविड' महामारीमुळे बळी गेलेल्यांच्या नातेवाईकांना 2 लाख रुपये आर्थिक मदत मिळत आहे. कोविड रिलीफ योजनेंतर्गत डिचोलीत अनेक पारंपरिक व्यावसायिकांनी अर्ज भरले आहेत.

व्यवसायिकांना दिलासा

कोविड रिलीफ योजनेंतर्गत अर्ज सादर करताना आता पारंपरिक व्यावसायिकांचे 300 ते 400 रुपये वाचणार आहेत. आतापर्यंत हा अर्ज शंभर रुपयांच्या मुद्रांक पेपरवर (स्टॅम्प पेपर) प्रमाणित डिक्लेरेशन देणे बंधनकारक होते. शंभर रुपयांचा मुद्रांक पेपर आणि त्यावर डिक्लेरेशनसंबंधीचा मजकूर टाईप करण्यासाठी 200 ते 300 रुपये खर्च येत होता. मात्र आता त्यात सूट देताना अर्जावरच डिक्लेरेशन द्यावे लागणार आहे. तसे सरकारने जाहिर केले आहे. त्यामुळे अर्जदारांचे पैसे वाचणार आहेत.