Babush Monserrate: गोव्याचे महसूल मंत्री आणि पणजीचे आमदार मंत्री बाबूश मोन्सेरात यांच्यावर बलात्काराचा आरोप असून या प्रकरणी सुनावणी सुरू आहे.

या बलात्कार प्रकरणातील पीडित तरुणीला 17 ते 20 जुलै या कालावधीत न्यायालयात हजर राहण्यासाठी समन्स जारी करावे, असा आदेश दक्षिण गोवा जिल्हा विशेष न्यायालयाने तपास अधिकाऱ्यांना दिला आहे.

बाबूश यांना अनुपस्थित राहण्याची परवानगी न्यायालयाने यापुर्वीच दिली होती. सोमवारी झालेल्या सुनावणीवेळी बाबूश उपस्थित नव्हते. तर दुसरी संशयित रोझी फेर्रांवही गैरहजर होत्या.

या प्रकरणातील पीडीत युवती मुंबईत नव्यानेच नोकरीला लागली आहे. तिला तत्काळ सुट्टी मिळणे कठीण आहे. त्यामुळे तिला सुनावणीला येण्यासाठी किमान 10 ते 15 दिवसांचा अवधी मिळावा, अशी विनंती केल्यानंतर न्यायालयाने पीडित युवतीचा जबाब 17 ते 20 जुलै याकाळात नोंदवावा, असे निर्देश दिले आहेत.

आणखी दोन साक्षीदारांना 21 जूनला उपस्थित रहावे, असा समन्स जारी करण्याचे निर्देशही दिले आहेत.