पणजी : केंद्रीय शिक्षण मंडळाने यंदापासून दहावीची परीक्षा दोन टप्प्यांत घेण्याचा निर्णय घेतला असला तरी गोव्यात मात्र ही परीक्षा यंदाही पारंपरिक पद्धतीने एकाच टप्प्यात घेतली जाणार आहे.

राष्ट्रीय शैक्षणिक धोरणाच्या शिफारशींनुसार विद्यार्थ्यांना तणावमुक्त ठेवण्यासाठी परीक्षा दोन टप्प्यांत घेण्यात येणार आहे. मात्र, गोवा सरकार याबाबत अजून अभ्यासक्रमात असून तातडीने अंमलबजावणी होणार नाही.

मुख्यमंत्री डॉ. प्रमोद सावंत यांच्या अध्यक्षतेखाली स्थापन केलेल्या समितीमार्फत या निर्णयाचा सर्वांगीण अभ्यास करण्यात येणार असून, त्यानंतर गोवा राज्य माध्यमिक व उच्च माध्यमिक शिक्षण मंडळाला योग्य ती शिफारस करण्यात येईल, असे शिक्षण सचिव प्रसाद लोलयेकर यांनी स्पष्ट केले.

दरम्यान, राष्ट्रीय शिक्षण धोरणांतर्गत शैक्षणिक मूल्यांकनात मूलगामी बदल सुचवले गेले असून, परीक्षा पद्धती सुलभ आणि बहुआयामी बनवण्याचा केंद्राचा प्रयत्न आहे.

गोवा सरकारही त्याच दिशेने पावले टाकत असून, राज्याच्या शैक्षणिक वास्तवाशी सुसंगत निर्णय लवकरच घेण्यात येईल, अशी माहिती मिळते.

दहावीच्या दोन टप्प्यांतील परीक्षा यंत्रणेबाबत विद्यार्थी, पालक, शिक्षक आणि शाळांना समजून घेण्यासाठी वेळ लागेल. त्यामुळे ही संकल्पना लागू करायची झाल्यास ती २०२५-२६ शैक्षणिक वर्षापासूनच शक्य होईल. - प्रसाद लोलयेकर, शिक्षण सचिव.