Rumdamol Panchayat Madrasah : रुमडामळ पंचायत परिसरात मदरशाचा मुद्दा काही केल्या मिटण्याचे नाव घेत नाही. बेकायदा मदरशामुळे त्रास होत असल्याची तक्रार काही दिवसांपूर्वी स्थानिकांनी ग्रामसभेत मांडली होती. या पंचायत क्षेत्रात असलेली मदरसा बंद करावी अशी मागणी स्थानिक अजूनही करत आहेत. आज झालेल्या ग्रामसभेतही हा मुद्दा पुन्हा एकदा पेटला आहे.

रुमडामळ पंचायतीने आज ग्रामसभेचे आयोजन केले होते. यावेळी पुन्हा एकदा मदरसा बंद करण्याची मागणी स्थानिकांनी ग्रामसभेत केली. गावात असलेली मदरसा बेकायदेशीर आहे. त्यामुळे स्थानिकांना त्रासाला सामोरे जावे लागत आहे अशी भूमिका स्थानिकांनी ग्रामसभेत मांडली.

मदरसा बेकायदेशीर असून हे बंद न झाल्यास तिथे डुक्कर आणून टाकणार असे वक्तव्य पंच सदस्याने केल्याने नव्या वादाला तोंड फुटले आहे.

दरम्यान, या मदरशाला पुर्वीच्या पंचायत कौन्सिलने मान्यता दिली होती. यातून लोकांना लाभ होत असून मंत्र्यांनी सुद्धा इथे भेटी दिल्याचे सांगण्यात येत आहे. आता याबाबत अंतिम निर्णय काय होणार याकडे सर्वांचे लक्ष लागून राहिले आहे.