पणजी: राज्यातील सरकारी इस्पितळे, सामुदायिक व प्राथमिक आरोग्य केंद्रांमध्ये येणाऱ्या रुग्णांची संख्या दिवसेंदिवस वाढल्याने कामावर बराच ताण येत आहे. ही उणीव भरून काढण्यासाठी राज्याबाहेरील डॉक्टर्सना कंत्राटी पद्धतीवर नेमणूक करण्याचा विचार सुरू आहे.

यासंदर्भात मुख्यमंत्र्यांशी चर्चा करून निर्णय घेण्यात येईल, गोमेकॉतील ओपीडी गोदामे होती, मी ती स्वच्छ केली, अशी कोपरखळी आरोग्यमंत्री विश्‍वजीत राणे यांनी आज प्रश्‍नोत्तर तासावेळी विधानसभेत दिली.

डिचोलीचे आमदार डॉ. चंद्रकांत शेट्ये यांनी डिचोली येथील सामुदायिक आरोग्य केंद्रात सध्या असलेल्या कर्मचाऱ्यांसंदर्भात प्रश्‍न विचारला होता. या केंद्राच्या क्षेत्रात सुमारे ४४ हजार लोकसंख्या आहे.

गेल्या काही वर्षांत केंद्राला भेट देणाऱ्या कर्मचाऱ्यांची संख्या वाढत असल्यान येथे अधिक डॉक्टर्स व परिचारिकांची गरज आहे. १२ परिचारिका या केंद्रासाठी असून परिचारिकांच्या कमतरतेमुळे रुग्णांना आरोग्य सोयी देण्यात अडचणी येत असल्याचे आमदार शेट यांनी निदर्शनास आणून दिले.

डिचोली प्राथमिक आरोग्य केंद्रात मंजूर असलेला कर्मचारी वर्ग असून त्यात कमतरता नाही. या इस्पितळात गैरसोयी आढळलेल्या नाहीत. मात्र, मंजूर झालेल्या कर्मचाऱ्यांची संख्या ही पूर्वीची आहे, असे राणे म्हणाले.

ऑपरेशन थिएटर बनले गोदाम

ज्या आरोग्य केंद्रात कर्मचारी कमी आहेत, त्या ठिकाणी कंत्राटी पद्धतीवर कर्मचारी का घेत नाही? डिचोली सामुदायिक आरोग्य केंद्रातील बाह्यरुग्ण विभागात रुग्णांची बरीच गर्दी असते. या केंद्रात शस्त्रक्रिया कक्ष (ऑपरेशन थिएटर) आहे मात्र तो विनावापर पडून आहे. हा कक्ष गोदाम बनला आहे, असे डॉ. शेट्ये म्हणाले.

राज्यात ‘हब अँड स्कोप’ मॉडेल राबवणार

डिचोली केंद्रात येणाऱ्या रुग्णांची संख्या वाढल्याने त्यांना हाताळण्यास कर्मचारी कमी पडत आहेत. त्यामुळे त्याचा आढावा घेऊन अधिक कर्मचाऱ्यांची सोय करायला हवी. त्यासाठी गोवा कर्मचारी निवड आयोगाकडे या जागा भरण्यासाठी प्रस्ताव पाठवला आहे. केंद्र सरकारचा ‘हब अँड स्कोप’ मॉडेल गोव्यातही लागू करण्याचा विचार अाहे.