म्हापसा: काँग्रेस आमदार कार्लस फेरेरा यांनी दिलेल्या 'सेक्स्टॉर्शन'च्या तक्रारीनंतर भाजपचे समर्थक आक्रमक झाले असून, हा प्रकार सेक्सरॅकेट असल्याचा आरोप करण्यात येत आहे. रविवारी (०८ डिसेंबर २०२४) नास्नोळा येथे माजी आमदार ग्लेन टिकलो यांच्या नेतृत्वाखाली भाजप मंडळाने फेरेरा यांच्या प्रतीकात्मक पुतळ्याचे दहन केले.

एक आक्षेपार्ह व्हिडिओ व्हायरल झाल्याने राज्यात खळबळ माजली आहे. हा व्हिडिओ काँग्रेसचे विद्यमान आमदार फेरेरा यांचा असून, त्यांनी हळदोणा गावाची नाच्चकी केली आहे, असा दावा करण्यात आला. दरम्यान भाजप पदाधिकाऱ्यांकडून उपरोक्त प्रकरणाच्या सखोल चौकशीची मागणी होत आहे.

गोव्यात गेल्या आठवड्यात 'सेक्स्टॉर्शन'प्रकरणी ओडिशाच्या एकाविरोधात गुन्हा नोंद करण्यात आला होता. विद्यमान आमदाराचा अश्लिल व्हिडिओ मोर्फ करुन सोशल मिडियावर व्हायरल केल्याची तक्रार पोलिसांना प्राप्त झाली. तक्रारीवरुन पोलिसांनी कुकेश राऊता (२५, रा. ओडिशा) याला अटक केली होती. संशयिताने या माध्यमातून आमदाराकडून पाच कोटीच्या खंडणीची मागणी केली होती.

या घटनेमुळे आता भाजप आणि काँग्रेस आमने सामने आले आहेत. आमदार फेरेरा यांच्या तक्रारीनंतर माजी आमदार ग्लेन टिकलो यांनी याप्रकरणात फेरेरा यांच्यावर टीकेची झोड उठवली आहे.