Korgao Pernem Bad Road

पेडणे: पेडणे ते कोरगाव या मुख्य रस्त्याला सगळीकडे मोठमोठे खड्डे पडले आहेत. आठ दिवसांच्या आत या रस्त्याची दुरुस्ती न केल्यास या रस्त्यावर ‘रास्ता रोको’ आंदोलन करण्यात येईल, असा इशारा पेडणे काँग्रेस गट समिती व समाजकार्यकर्त्यांनी दिवाळीच्या दिवशी रात्री पराष्टे येथे खड्ड्यांत मेणबत्त्या लावून सरकारला दिला.

या मोहिमेत ॲड. जितेंद्र गावकर, कृष्णा नाईक, समाजकार्यकर्ते भास्कर नारुलकर, उदय महाले यांनी भाग घेतला. यावेळी ॲड. जितेंद्र गावकर म्हणाले की, पेडणे ते कोरगावपर्यंत रस्ता पूर्णपणे उखडून गेला असून त्या रस्त्याला मोठमोठे खड्डे पडलेले आहेत. या रस्त्याची अशाप्रकारे दुर्दशा झाल्याने रोज या ठिकाणी छोटे-मोठे अपघात होतच असतात. पेडणे तालुक्यात सरकारने एक असा रस्ता दाखवावा की, ज्या रस्त्याला खड्डे नाहीत. पराष्टेतील रस्त्याची पंधरा दिवसांत दुरुस्ती सुरू करावी. अन्यथा या ठिकाणी आम्ही रस्ता रोको आंदोलन करू.

मालपेतील रस्ता कधी खुला होणार?

१. पेडणेतील मालपे येथे पावसात कोसळलेल्या दरडीमुळे नवीन केलेला रस्ता वाहतुकीस बंद होऊन आता जवळ-जवळ पाच महिने होत आले आहेत. मात्र, हे दरड हटविण्याचे काम संथ गतीने सुरू असल्यामुळे हा रस्ता कधी खुला होणार याबाबत लोकांकडून अनेक प्रश्‍न उपस्थित होत आहेत.

२. तसेच यानंतर पर्यायी वाहतुकीसाठी खुल्या केलेल्या मालपेतीलच जुन्या रस्त्यावर पडलेल्या मोठमोठ्या खड्ड्यांमुळे अनेक अपघात घडले. हा रस्ता दुचाकीचालक तसेच अवजड वाहतुकीसाठी अगदी जीवघेणा ठरला. आता दुरुस्ती सुरू असली तरीही चढणीवरील रस्ता धोकादायकच आहे.