Compound Wall Collapsed in Mapusa: दोन दिवसांपासून राज्यात पावसाला सुरुवात झाली असून अनेक ठिकाणी पडझड झाल्याच्या घटनाही सुरू झाल्या आहेत. काल दिवसभरात अग्निशमन आणि आपत्कालीन सेवांनी 20 घटना हाताळल्याची माहिती दिली आहे. यामध्ये म्हापसामध्येही पावसाचा फटका बसला असून एका घराच्या कंपाऊंडची भिंत कोसळली आहे.

माहितीनुसार, म्हापशातील एकता नगर येथे झालेल्या मुसळधार पावसाने एका घराच्या कंपाऊंडची भिंत कोसळली. यामुळे भिंतीला लागून उभ्या असलेल्या दोन चारचाकी वाहनांचे नुकसान झाले आहे. यामध्ये एकूण 5 लाखांचे नुकसान झाले असल्याचे सांगण्यात येत आहे.

सुदैवाने यामध्ये कोणत्याही प्रकारची जीवितहानी झाली नाही.

दरम्यान, दोन दिवसात अनेक ठिकाणी रस्त्यांवर आणि वाहनांवर झाडे कोसळल्याने नागरिकांना नाहक त्रास सहन करावा लागला आहे. फोंड्यात पावसाने दाणादाण उडवल्याने येथील जनजीवन विस्कळीत झाले आहे. येथील सखल भागात पाणी साचले आहे. नाले दुथडी भरून वाहत असल्याने अनेक ठिकाणी घरात पाणी घुसले.

फर्मागुडी येथे पार्किंगमधील एका कारवर गुलमोहराचे झाड कोसळले. यात गाडीचे मोठे नुकसान झाले. सुदैवाने या वेळी गाडीत किंवा या परिसरात कुणी नव्हते त्यामुळे जीवीतहानी झालेली नाही.