सिरसई येथील एका युवती व तिच्या आईचा विनयभंग करून पीडितेचा पाठलाग करणार्‍या संशयित आरोपी प्रवीण पार्सेकर (22, रा. कान्सा थिवी) यास कोलवाळ पोलिसांनी अटक केली.

हा प्रकार गेल्या दि. 3 जानेवारी रोजी घडला होता. फिर्यादी पीडित युवतीचा अज्ञात संशयिताने दुचाकीवरून पाठलाग केला व तिला पकडून तिचा विनयभंग केला. नंतर त्याच दिवशी संशयित फिर्यादींच्या घराच्या व्हरांड्यात गेला. तिथे पीडितेची आई होती तिला पाहून त्याने हस्तमैथुन केले आणि लैंगिक अनुकुलतेची मागणी केली. यास नकार दिल्यावर तिला संशयिताने जीवे मारण्याची धमकी दिली.

शिवाय संशयिताने दि. 3 पासून 16 जानेवारी पर्यंत पीडितेचा पाठलाग केला. या प्रकाराला घाबरून पीडितेने शुक्रवारी पोलिसांत धाव घेत रितसर तक्रार दाखल केली. त्यानुसार पोलिसांनी भा. दं.सं.च्या 354 अ, 354 ड, 448, 509, 504, 506(2) या कलमांतर्गत गुन्हा नोंदवला व पोलिसांनी अज्ञात संशयिताचा शोध जारी केला.

या भागातील सीसीटिव्ही फुटेजची पोलिसांनी पडताळणी केली. त्यानुसार संशयिताच्या दुचाकी पोलिसांनी ओळख पटवली व त्याद्वारेवरील संशयितास शनिवारी 20 रोजी पकडून अटक केली. तसेच दुचाकी जप्त केली. संशयिताला म्हापसा प्रथम वर्ग न्यायालयाने 3 दिवसांची पोलीस कोठडी सुनावली.

पोलीस निरीक्षक विजय राणे यांच्या मार्गदर्शनाखाली उपनिरीक्षक भरत खरात यांच्या नेतृत्वाखाली पोलिसांनी ही कामगिरी केली. पुढील तपास पोलीस अधीक्षक निधीन वाल्सन व उपअधीक्षक संदेश चोडणकर करीत आहेत.