म्हापसा: कोलवाळ मध्यवर्ती कारागृहातील अंतर्गत सुरक्षेचे धिंडवडे पुन्हा एकदा निघाले आहेत. अवघ्या आठवड्याभरात कैद्यावर झालेल्या दुसऱ्या हिंसक हल्ल्यामुळे तुरूंग प्रशासनाच्या कार्यक्षमतेवर आणि कायद्याच्या सुव्यवस्थेवर गंभीर प्रश्नचिन्ह निर्माण झाले आहे.

मिळालेल्या माहितीनुसार, मंगळवार, २६ मे रोजी रात्री १० वा.च्या सुमारास तुरुंगातीलच सहकारी कैद्याने ४५ वर्षीय देवराज नावाच्या कैद्यावर अचानक हल्ला चढवला. या कैद्याने देवराज याला लाथाबुक्क्यांनी मारहाण केली. यात देवराज जखमी झाला. यावेळी घटनास्थळी धाव घेत तुरुंग कर्मचाऱ्यांनी जखमी देवराजची संशयित कैद्याच्या तावडीतून सुटका केली.

तुरुंग प्रशासनाने जखमी कैद्यावर तातडीने प्रथमोपचार करून पुढील उपचारासाठी त्याला म्हापसा जिल्हा रुग्णालयात दाखल केले होते. विशेष म्हणजे, ही घटना मंगळवारी रात्री घडलेली असतानाही, बुधवार, २७ रोजी सायंकाळी उशिरापर्यंत कारागृह प्रशासनाकडून कोलवाळ (Colvale) पोलिसांत याप्रकरणी कोणतीही अधिकृत तक्रार दाखल करण्यात आली नव्हती.

कायदा, सुव्यवस्था कोलमडली

कोलवाळ कारागृहात हिंसेची ही पहिलीच घटना नाही. यापूर्वी शनिवारी (२३ मे) दुपारी अशीच एक घटना घडली होती, ज्यामध्ये अंडर ट्रायल राकेश पाटील या कैद्याला नारायण ऊर्फ बाबू भालेकर याने बेदम मारहाण केली होती. ही घटना ताजी असतानाच, अवघ्या तीन ते चार दिवसांत पुन्हा झालेला हा दुसरा हल्ला कारागृहातील अंतर्गत सुरक्षेचे नियोजन, कैद्यांवर ठेवले जाणारे लक्ष आणि एकूणच तिथली कायदा व सुव्यवस्था पार कोलमडल्याचे दिसून येत आहे.