कोलवाळ: दुचाकीवरील नियंत्रण सुटल्याने कोलवाळ येथे झालेल्या गंभीर अपघातात समृद्धी वायंगणकर हिचा दुर्दैवी मृत्यू झाला आहे. खोर्ली म्हापसा येथील २५ वर्षीय समृद्धी हिचे गोवा मेडिकल कॉलेजमध्ये उपचारादरम्यान पहाटे निधन झाले. म्हापसा पालिकेच्या विद्यमान नगरसेविका शुभांगी वायंगणकर आणि माजी नगरसेवक गुरूदास वायंगणकर यांची ती कन्या होती.

अपघात कसा झाला?

२० एप्रिल रोजी सकाळी कोलवाळ पुलावर हा गंभीर अपघात झाला. पेडणेहून कोलवाळला येणाऱ्या दुचाकीवरचे नियंत्रण सुटल्याने गाडी कलंडली आणि अपघात झाला.

या अपघातात समृद्धीचं डोकं पुलाच्या फुटपाथला आदळल्याने ती जागीच बेशुद्ध होऊन पडली. यावेळी समृद्धीची मैत्रीण सिध्दाली महाले (२४, गिरी) ही गाडी चालवत होती ती देखील या अपघातात गंभीर जखमी झाली आहे.

सिध्दाली महाले हिचा अपघातात पाय मोडला होता. तिला काही उपचारांनंतर घरी पाठवण्यात आले मात्र समृद्धीची प्रकृती गंभीर असल्याने तिच्यावर उपचार सुरूच होते. उपचार सुरु असतानाच २० मे रोजी समृद्धीने प्राण सोडले.

तिच्यावर संध्याकाळी ४:३० वाजता खोर्ली येथील शांतीवन स्मशानभूमीत अंत्यसंस्कार होणार आहेत. या अपघाताचा पंचनामा पेडणे पोलीस उपनिरीक्षक विवेक हळर्णकर व हवालदार विनायक तळावणेकर यांनी केला आणि सध्या पोलीस या अपघाताचा आणखीन तपास करत आहेत.