Stolen gold of IAS officer recovered from Karnataka

मडगाव: वार्का येथील क्लब महिंद्रा येथे उतरलेल्या एका आयएएस अधिकाऱ्याचे दहा लाखांचे सुवर्णालंकार चोरी झालेल्‍या प्रकरणाचा कोलवा पोलिसांनी छडा लावला असून चोरीला गेलेले दागिने कर्नाटकातील संक्लेशपुरम-मंगळूर येथून हस्तगत केले आहेत. या प्रकरणात पोलिसांनी अटक केलेला कासीम फय्याज याने चोरीचे हे दागिने आपला मित्र एस. एम. प्रदीप याला देऊन त्याच्याकडून ८५ हजार रुपये घेतले होते असे तपासात आढळून आले आहे. 

प्रदीपला चौकशीसाठी कोलवा पोलिस ठाण्यात हजर राहण्यासाठी नोटीस बजावली आहे. नोएडा-उत्तरप्रदेश येथील अर्पित उपाध्याय हे तक्रारदार आहेत. ते आयएएस अधिकारी असून पत्नीसह गोव्यात फिरायला आले होते. क्लब महिंद्रा येथे ते राहिले होते. कासीम हा मूळ कर्नाटकातील उडुपी येथील आहे.

दागिने देऊन दुसऱ्याकडून घेतले पैसे

मागच्या वर्षी २२ ऑक्टोबरला ही चोरीची घटना घडली होती. कासीम याला त्‍या महिन्यात पोलिसांनी अटक केली होती. चौकशीवेळी त्याने चोरीची कबुली देताना आपण हे दागिने कुणाला दिले, याची माहितीही पोलिसांना दिली. आपण आर्थिक विवंचनेत असल्याचे प्रदीपला सांगून व हे दागिने आपली पत्नी व मुलीचे असल्याचे खोटे सांगून त्याच्याकडून पैसे घेतले होते.