बेताळभाटी: नवीन वर्षाच्या स्वागताचा जल्लोष एका कष्टकरी मच्छिमारासाठी दुर्दैवी ठरला आहे. कोलवा येथील मच्छिमार सेंटन फर्नांडिस यांचे 'रापण' म्हणजेच मासेमारीचे जाळे मध्यरात्री लागलेल्या आगीत पूर्णपणे जळून खाक झाले. या आगीमुळे त्यांचे मोठे आर्थिक नुकसान झाले असून, त्यांनी सरकारकडे मदतीची मागणी केली आहे.

नेमकी घटना काय?

मिळालेल्या माहितीनुसार, ही घटना बेताळभाटी समुद्रकिनाऱ्यावर (३१ डिसेंबर) मध्यरात्रीच्या सुमारास घडली. सेंटन फर्नांडिस यांनी आरोप केला आहे की, समुद्रकिनाऱ्यावर काही पर्यटक मोठ्या प्रमाणावर फटाक्यांची आतषबाजी करत होते. या फटाक्यांमधील एक ठिणगी किनाऱ्यावर ठेवलेल्या त्यांच्या मासेमारीच्या जाळ्यावर पडली आणि क्षणार्धात आगीने रौद्र रूप धारण केले.

जीवरक्षक आणि स्थानिकांची धावपळ

जाळ्याला आग लागल्याचे लक्षात येताच घटनास्थळी उपस्थित असलेले जीवरक्षक आणि स्थानिक नागरिकांनी तातडीने धाव घेतली. सर्वांनी मिळून पाण्याचा मारा करून आग विझवण्याचा प्रयत्न केला आणि काही वेळात आग नियंत्रणात आणली. मात्र, तोपर्यंत मासेमारीसाठी वापरले जाणारे महागाचे जाळे पूर्णपणे जळून कोळसा झाले होते.

आर्थिक संकट आणि मदतीची मागणी

सेंटन फर्नांडिस यांच्यासाठी हे जाळे त्यांच्या उपजीविकेचे एकमेव साधन होते. या घटनेमुळे त्यांच्यासमोर मोठे आर्थिक संकट उभे राहिले आहे. "पर्यटकांच्या एका छोट्याशा चुकीमुळे माझे वर्षभराचे कष्ट मातीत मिळाले आहेत," अशा भावना त्यांनी व्यक्त केल्या आहेत. त्यांनी शासनाला विनंती केली आहे की, या नुकसानीचा पंचनामा करून त्यांना तातडीने भरपाई देण्यात यावी.