Accidents in Goa: गोव्यात रस्ते अपघातात विलक्षण वाढ झाली आहे. वाहतूक पोलीस विभाग हे अपघात थांबावेत यासाठी सतर्क असून अपघात होण्याच्या कारणांचा समूळ नाश करण्याच्या प्रयत्नात आहेत. मात्र तरीही म्हणावे तशा या घटना कमी झाल्याचे चित्र दिसत नाही.

गोव्यातील तार बस्तोडा इथे काही वेळापूर्वी अपघात घडला आणि यामध्ये एकजण जखमी झाल्याचे सांगण्यात येत आहे.

मिळालेल्या माहितीनुसार, बस्तोडा येथील राष्ट्रीय महामार्गावरील उड्डाण पुलावर हा अपघात घडला आहे. कार आणि प्रवासी रिक्षा यांच्यात जोरदार धडक झाली. ही धडक इतकी भीषण होती की रिक्षाचालक यामध्ये गंभीर जखमी झाला आहे. रिक्षाचालकाला वैद्यकीय उपचारासाठी हॉस्पिटलमध्ये दाखल करण्यात आले असून, संबंधित घटनेचा पुढील तपास सुरू आहे.

दरम्यान, गोव्यातील वाढत्या अपघातांच्या पार्श्वभूमीवर गोवा वाहतूक पोलीस आणि सरकार अधिकच सतर्क झाले आहे. जास्त करून अपघात हे वाहतूक नियमांचे उल्लंघन केल्यानेच होतात हे निदर्शनास आल्यावर वाहतूक पोलीस विभाग अॅक्शन मोडमध्ये आहे. राज्यभरात ठिकठिकाणी पोलिसांनी नियम मोडणाऱ्या वाहनचालकांवर कारवाई करत दंड आकारण्यास सुरुवात केली आहे.

शुक्रवारी गोवा पोलिसांनी राज्यभरात सुमारे 2,000 वाहतूक उल्लंघनांवर गुन्हा दाखल करून केवळ एका दिवसात 10 लाख रुपयांहून अधिक दंड वसूल केला. यावेळी डेप्युटी एसपी सिद्धांत शिरोडकर म्हणाले की, गेल्या वर्षी याच दिवशी वाहतूक पोलिसांनी अवघे दोन लाख रुपये जमा केले होते.