सासष्टी: गत दीड ते दोन महिन्यांपासून नारळाच्या किमती स्थिर आहेत. आम्ही तीन प्रतींचे नारळ अनुक्रमे २४, २८ व ३२ रुपये दराने विकत आहोत. मात्र, काहींनी हा दर ५० ते ६० रुपये असल्याच्या अफवा पसरवल्या आहेत. हे योग्य नाही, असे नारळ विक्रेते शंकर सावंत यांनी सांगितले.

चतुर्थीलादेखील नारळाच्या किमती वाढणार नाहीत, असे त्यांनी सांगितले. गोव्यात माकड व इतर जनावरांमुळे नारळाचे उत्पादन कमी होत आहे. नारळ पाडण्यासाठी मजूर उपलब्ध नाहीत. भाटकार हतबल आहेत. भाटांमध्ये काम करून काहीच उपयोग नाही, असे भाटकार म्हणतात, असे सावंत यांनी सांगितले.

इतर राज्यांतून आयात

एका भाटकाराकडून आम्ही ४० ते ५० हजार नारळ विकत घेत होतो. यावेळी केवळ १५ हजार नारळ मिळाले, असे त्याने सांगितले. सध्या गोव्यात नारळ दावणगिरी, तमिळनाडू व कर्नाटकातील इतर भागांतून आणावा लागतो, अशी माहिती त्यांनी दिली.