पणजी: गोव्यातील लोकांचे ताट हे नारळाशिवाय अपूर्ण आहे. सकाळचा नाश्ता असो किंवा दुपारचं जेवण आपल्याकडे प्रत्येक पदार्थात खोबरं हे आवर्जून टाकलं जातं. दिवसेंदिवस वाढणारी मागणी आणि कमी पुरवठा यामुळे राज्यात नारळाचे दर वाढलेत. पणजी विक्रेत्यांकडून मिळालेल्या माहितीनुसार सध्या नारळाचे दर १० ते १५ रुपयांनी महागले आहेत.

डिसेंबर महिन्याच्या शेवटी राज्यात नारळ महागला. इथे नारळाच्या आकारानुसार त्याचे दर बदलतात, त्याप्रमाणे सध्या मोठा नारळ ४५ ते ५० आणि लहान आकाराचा नारळ २५ रुपयांना विकला जातोय, तर माध्यम आकाराचा नारळ हा ३५ ते ४० रुपयांच्या किमतीला उपलब्ध आहे.

नाताळ सणानंतर गोव्यात नारळाच्या किमतींनी गगनभरारी घेतलीये. सध्या राज्यात माकडाचा उपद्रव वाढलाय तसेच माडांच्या झाडांना रोगांनी ग्रासलंय त्यामुळे नारळाचं उत्पन्न काम कमी झालं आहे.

गोव्यात नारळ हा अतिशय महत्वाचा घटक असल्याने बाजारातील वाढत्या मागणीमुळे दर वाढले आहेत. शिवाय राज्यात सध्या नारळ पडणाऱ्या पाडेलीचा खर्चही वाढला असल्याने बाजारात हवा तास पुरवठा होत नाहीये. राज्यातील बाकी ठिकाणच्या तुलनेत पणजीत नारळाचे दर सर्वात अधिक आहेत.