पणजी: गोव्याचे मुख्यमंत्री डॉ.प्रमोद सावंत यांचा ई-मेल अकाउंट शनिवारी (३० नोव्हेंबर) अचानक हॅक झाला. मुख्यमंत्र्यांचा अकाउंट हॅक झाल्याने खळबळ उडाली होती. या प्रकरणाचे गांभीर्य लक्षात घेऊन केवळ ४ ते ५ तासांच्या आत हा अकाउंट रिकव्हर करण्यात आला आणि रिकव्हर केलेल्या अकाउंटमध्ये कुठलेही हानी दिसून आली नाही. सध्या सायबर पोलीस हॅकर्सनी कोणते ईमेल पाठवले आहेत का, वैयक्तिक ॲक्सेस मिळवला आहे का किंवा इतर कोणत्याही बेकायदेशीर व्यवहार केले आहेत का याचा तपास करीत आहेत.

मिळालेल्या माहितीनुसार मुख्यमंत्री डॉ. प्रमोद सावंत यांचा ई-मेल युट्युबशी जोडलेला आहे. अकाउंट हॅक झाल्याची बातमी मिळताच सायबर पथकाने घटनेचा तपास केला.

सध्या मुख्यमंत्र्यांच्या ई-मेल अकाउंटची सुरक्षितता सुनिश्चित करण्यासाठी तसेच कोणताही गैरवापर टाळण्यासाठी सर्व उपाययोजना केल्या जात असल्याची माहिती सायबर अधिकाऱ्यांनी द गोवन या इंग्रजी वृत्तपत्राला दिली.

यापूर्वी २०२१ मध्ये मुख्यमंत्र्यांचा फेसबुक अकाउंट हॅक झाला होता आणि त्यावेळी हॅकर्सनी वैद्यकीय आपत्कालीन परिस्थितीसाठी आर्थिक मदत मागत काही लोकांना संदेश पाठवले होते.