Goa Corona: कोरोना विषाणुमुळे उद्भवलेल्या महारोगराईच्या पहिल्या दोन लाटांमध्ये आघाडीवर राहून महत्वाची भूमिका पार पाडणाऱ्या कोरोना योद्धांचे कौतूक खूप झाले. त्यांच्या कामाची दखल घेत त्यांना मुख्यमंत्री डॉ. प्रमोद सावंत यांनी 20 टक्के पगारवाढीचे आश्वासनही दिले होते. तथापि, ही वाढ कोविडयोद्ध्यांना अद्यापही मिळालेली नाही.

मुख्यमंत्री सावंत यांनी 2020 मध्ये कोरोना साथीच्या सुरूवातीस ही घोषणा केली होती. त्या काळात ऐन कोरोना महारोगराईत आघाडीवर राहून हे योद्धे काम करत होते. त्यांना नायक म्हणूनही गौरवले जात होते. तेव्हा मुख्यमंत्री सावंत यांनी 20 टक्के वाढीचे आश्वासन दिले होते तसेच विमा संरक्षणाचीही घोषणा केली होती.

इंडियन मेडिकल असोसिएशन (आयएमए) गोवा या डॉक्टरांच्या संघटनेने, गुरुवारी अर्थसंकल्पपूर्व सल्लामसलतीसाठी मुख्यमंत्र्यांची भेट घेतली. तेव्हा या आश्वासनाची आठवण मुख्यमंत्र्यांना करून देण्यात आली. 20 टक्के पगारवाढ नेमकी कुणाला, याबाबत संदिग्धतेमुळे हा प्रस्ताव लांबणीवर पडला होता.

याबाबत मुख्यमंत्री कार्यालयाला जीएमसी आणि आरोग्य सेवा संचलनालयाकडून अशा दोन स्वतंत्र फाईल्स सादर करायच्या होत्या. पण अशा फाईल्स सादर केल्या गेल्या नाहीत, असे समजते. तथापि, आता कोरोनायोद्धा म्हणून काम केलेल्या डॉक्टरांनाही या पगारवाढीचा अपेक्षा राहिलेली नाही. परंतु कनिष्ठ डॉक्टर, परिचारिका आणि इतर वैद्यकीय कर्मचाऱ्यांना काहीतरी द्यायला हवे, असे मानणारा एक वर्ग आहे.