पणजी: मये मतदारसंघातील सिकेरी व हळदोणे मतदारसंघातील खोर्जुवे या दोन्ही गावांमध्ये असलेल्या खाडीवरील पदपुलाचे पुनर्बांधकाम जागा उपलब्ध केल्यास केले जाईल, अशी माहिती मुख्यमंत्री डॉ. प्रमोद सावंत यांनी आज विधानसभेत मयेचे आमदार प्रेमेंद्र शेट यांच्या लक्षवेधी सूचनेला उत्तर देताना दिली.

या नाल्यावरील पदपूल जुना असून तो मोडकळीस आलेला आहे. हा पदपूल केव्हाही कोसळू शकतो, त्यामुळे तो धोकादायक बनला आहे. या पुलावरून खोर्जुवे येथील काही विद्यार्थी मये येथील शाळांमध्ये शिकण्यासाठी जातात. त्यामुळे हा पदपूल खूपच महत्वाचा आहे.

सार्वजनिक बांधकाम खात्याने त्‍याची पाहणी करून पुलाचे बांधकाम करणे शक्य असल्याचा अहवाल दिला आहे. या पुलामुळे खोर्जुवे तसेच सिकेरी येथील रहिवाशांची अनेक वर्षांपासूनची समस्या सुटणार आहे, असे आमदार शेट म्हणाले.

सदर पदपूल लोखंडाचा वापर करून तेथील स्थानिक लोकप्रतिनिधीने खाण कंपन्यांच्या मदतीने बांधला होता. दरदिवशी सुमारे १०० दुचाकीचालक या पदपुलाचा वापर करतात. नाल्यातील खाऱ्या पाण्यामुळे पदपुलाचे लोखंड गंजून खराब झाले आहे.

त्यामुळे हा पदपूल पादचारी व दुचाकीस्वारांसाठी धोकादायक बनला होता. पैरा-खोर्जुवे येथे जीएसआयडीने तेथून १.४० किलोमीटर अंतराचा नवा पूल बांधला आहे. त्याचा वापर न करता लोक या धोकादायक पुलाचाच वापर करतात. आमदार शेट यांनी केलेल्या मागणीची दखल घेत त्याचे पुनर्बांधकाम केले जाईल असे आश्‍वासन मुख्यमंत्र्यांनी दिले.